Rossiya Federal xavfsizlik xizmati (FXX) xodimlari 2019-yildan 2024-yilgacha muntazam ravishda Qora dengiz sohilidagi Gelenjik saroyi va Kareliyadagi Maryalaxit ko‘rfazidagi qarorgoh atrofida yugurish yo‘nalishlarini belgilab kelgan. Bu haqda Strava fitnes ilovasi ma’lumotlariga tayanib, Le Monde nashri xabar berdi.
Mazkur ikki obyekt orasida deyarli 2000 kilometr masofa mavjud bo‘lsa-da, ularni bir narsa bog‘lab turadi: Vladimir Putinning qo‘riqchilari ushbu obyektlar yaqinida tez-tez paydo bo‘ladi, deb yozadi Le Monde ochiq ma’lumotlarga asoslanib.
Saroy va qarorgoh Putinning shaxsiy mulki sifatida qaraladi. Birinchi obyekt haqida rossiyalik muxolifatchi Aleksey Navalniy jamoasi 2021-yilda surishtiruv o‘tkazgan bo‘lsa, ikkinchisi haqidagi ma’lumotni “Dosye” markazi 2024-yil yanvar oyida oshkor qilgan.
Le Monde nashrining qayd etishicha, sport ilovasi orqali qo‘riqchilar o‘z natijalarini va geolokatsiyalarini ochiq holda e’lon qilgan. Ularning Qora dengiz va Kareliyadagi qarorgohlar atrofidagi yugurishlari Putin omma oldida ko‘rinmagan va uning oldindan yozib olingan chiqishlari Rossiya davlat telekanallarida efirga uzatilayotgan paytlarga to‘g‘ri kelgan. Biroq, jurnalistlar bu ma’lumotlar Rossiya prezidentining ayni vaqtda shu joylarda bo‘lganiga yuz foiz kafolat bermasligini aytmoqda.
Strava ilovasi Rossiya prezidentining koordinatalarini bir necha bor fosh qilgan
Le Monde nashriga ko‘ra, Strava ilovasi orqali Rossiya prezidenti Vladimir Putin ishtirok etgan uchrashuvlarning joylashuvi aniqlangan. 2019-yil 13–14-noyabr kunlari Putin Braziliya poytaxtida BRIKS sammitida qatnashgan. 11-noyabr kuni Rossiya prezidenti joylashishi kerak bo‘lgan mehmonxonada FXX xodimi bo‘lgan. Rahbarining kelishini kutib, u Strava ilovasidagi marshrutga ko‘ra, mehmonxona kirish qismida boshlanib, shu yerda tugaydigan yugurishga chiqqan.
Putinning Isroil va BAAga safarlari chog‘ida unga hamroh bo‘lgan yana bir shaxsiy qo‘riqchisi 2022-yilda uchrashuv joyiga olib boradigan yo‘ldan yugurgan.
Nashrning ta’kidlashicha, Strava ma’lumotlari 2023-yil sentyabr oyida KXDR rahbari Kim Chen In bilan uchrashuvda Putinning joylashuvini oldindan aniqlash imkonini bergan. Safardan bir necha kun oldin Putin qo‘riqchisi Blagoveshchenskda yugurish uchun yo‘nalish belgilagan. Ushbu shahar yaqinidagi “Sharqiy” kosmodromda keyinchalik Putinning KXDR rahbari bilan uchrashuvi bo‘lib o‘tgan.
Bu Le Monde jurnalistlari tomonidan StravaLeaks deb nomlangan tergovining yakuniy, uchinchi qismi hisoblanadi. Dastlabki ikki qismga ko‘ra, AQSH prezidenti Jo Bayden, sobiq prezident Donald Tramp va Fransiya rahbari Emmanuel Makronning qo‘riqchilari ham ilovada o‘zlarining sport yutuqlarini ulashgan. Bu ma’lumotlar siyosatchilarning harakatlanishlarini kuzatish imkonini ham bergan.
Izoh (0)