Toshkent shahrida 2 yoshli qizchani muttasil do‘pposlab kelgan tojikistonlik enagaga sud hukmi o‘qildi. Bu haqda Shahar sudlari axborot xizmati “Daryo”ga xabar berdi.
Keltirilishicha, u 2022-yildan to 2024-yil oktyabr oyiga qadar bo‘lgan vaqt davomida tanishining farzandlariga enagalik qilish uchun uning uyida ishlab, yashab kelgan. Doimiy ravishda xonadon egasi uyga savdo pullarini olib kelgan vaqtida, uning chalg‘iganidan foydalanib, 1-2 mln so‘mdan umumiy hisobda 118 mln so‘m naqd pulni o‘g‘irlab, o‘z ehtiyojlari uchun sarflab yuborgan.
Bundan tashqari, 2022-yildan to 2024-yil oktyabr oyiga qadar bo‘lgan vaqt davomida mazkur tanishining farzandlariga enagalik qilgan. Uy egasi uyda bo‘lmagan paytlarda muttasil ravishda uning 2022-yilda tug‘ilgan qizini do‘pposlab, tanasining turli qismlariga urib, tan jarohati yetkazgan.
Sud hukmiga ko‘ra, ayol 5 yil 1 oy muddatga ozodlikdan mahrum qilindi va jabrlanuvchi foydasiga zarar undiriladi.
Yanvar oyi boshlarida Farg‘onada 2 yoshli bola enaga tufayli og‘ir jarohat olgandi. Holat yuzasidan jinoyat ishi qo‘zg‘atilgan. 7-yanvar kuni Toshkent viloyatida onasi tomonidan kaltaklangan 4 yoshli qiz vafot etdi. Ushbu holat yuzasidan ham jinoyat ishi qo‘zg‘atilib, ayol qamoqqa olingan.
Toshkent shahar Chilonzor tumanida enagasi bilan sayrga chiqqan 1 yoshli qizaloq daraxt bosib qolishi oqibatida halok bo‘lgani to‘g‘risida xabar berilgandi.
Izoh (0)