Har bir ota-ona yaxshi multfilm tanlash qanchalik qiyin bo‘lishini biladi. Hech kim bosh og‘rig‘ini keltirib chiqaradigan animatsion hayvonning chiyildoq ovozini eshitishni, ahmoqona hazillar va qo‘rqinchli kadrlardan seskanib tushishni xohlamaydi. Shuning uchun nafaqat bolalarga, balki kattalarga ham yoqadigan multfilmlar to‘plamini taqdim etamiz.
“Botinka kiygan chig‘anoq Marsel”
Bu Marsel ismli kichkina gapiruvchi chig‘anoq haqidagi ta’sirli hikoya bo‘lib, u buvisi Konni va uy hayvoni — Alan ismli bir parcha jun bilan yashaydi. Bir kuni Marsel yashaydigan kvartirani rejissyor Din ijaraga oladi. U kichkina chig‘anoq bilan tanishadi va u haqda hujjatli film suratga olishga qaror qiladi. Animatsiya va jonli harakatning kombinatsiyasi bo‘lgan mazkur multfilm samimiyligi va g‘ayrioddiy konsepsiyasi, shuningdek, komediya va ta’sirchan drama o‘rtasidagi muvozanati uchun tanqidchilar e’tirofiga sazovor bo‘lgan.
“Klaus”
Santa Klaus afsonasining paydo bo‘lishi haqida hikoya qiluvchi ajoyib va ta’sirli Rojdestvo to‘g‘risidagi multfilm. Hikoya boyvachchaning erkatoy o‘g‘li Jesperning pochta akademiyasida o‘qishni barbod qilishi bilan boshlanadi. Jazo sifatida pochta xizmati boshlig‘i bo‘lgan otasi Jesperni uzoq va sovuq Smirensburg shahriga yuboradi, u yerda esa odamlar dushmanlikda yashaydi. Yigitning vazifasi — yiliga 6000 ta xat jo‘natib, pochta xizmatini yo‘lga qo‘yish. Biroq Jesper ajoyib yog‘och o‘yinchoqlar yasaydigan sokin va mehribon o‘tinchi Klaus bilan uchrashganda hammasi o‘zgaradi. Multfilmda ta’sirli lahzalar kulgili lahzalar bilan uyg‘unlashadi, animatsiya esa an’anaviy 2D-texnikani zamonaviy vizual effektlar bilan uyg‘unlashtirgan holda o‘ziga xos uslubda amalga oshiriladi va haqiqiy sehrli dunyoni yaratadi.
“Uilloblar oilasi”
Bu Uilloblar oilasining to‘rtta farzandi haqidagi hikoya bo‘lib, ular o‘ta xudbin va befarq ota-onasi bilan yashaydi. Janob Uillob va Uillob xonim farzandlariga mutlaqo qiziqmaydi va ularni hayotlariga to‘siq deb hisoblashadi. Bolalar — Tim, Jeyn va egizak Barnabilar baxtli va ahil oilani orzu qilishgani bois ularning zulmidan qutulish uchun ota-onalarini xavfli sayohatga jo‘natishga qaror qilishadi. Ota-onalari sayohatda bo‘lgan paytda bolalar ideal oila yaratishga urinib, dunyoda o‘z o‘rinlarini izlay boshlaydi. Ularga mehribon enaga yordam beradi, u bolalar hayotiga iliqlik va g‘amxo‘rlik olib kiradi. Bu o‘tkir, o‘ziga xos va ilhomlantiruvchi hikoya bo‘lib, u bolalar va kattalarga chinakam munosabatlar va o‘zaro tushunishning ahamiyatini o‘rgatadi.
“Sehrli ajdar”
Sony Pictures Animation studiyasi va Xitoy animatorlari bilan hamkorlikda yaratilgan mazkur multfilm ezgulik, hazil-mutoyiba va Sharq falsafasi bilan to‘la. Bosh qahramon — samimiy, ammo Shanxayda yashovchi kambag‘al talaba Din. U oilasi bilan ko‘chib kelganida bolalikdagi do‘sti Li Na bilan uchrashishni orzu qiladi. Bir kuni taqdir unga qadimiy choynak tuhfa qiladi, undan Lun — yangi xo‘jayinining uchta istagini bajarishga tayyor qudratli ajdarho paydo bo‘ladi. Multfilm “Alovuddin”ning klassik syujetini eslatadi.
“La Mansh gigantlari”
Afsonaviy don Kixotning avlodi bo‘lgan 11 yoshli Alfonso Kixot haqida hikoya. U Ispaniyaning La Mansh shahridagi kichik bir shaharchada yashaydi va mashhur bobosi kabi jasorat ko‘rsatishni orzu qiladi. Don Kixotning sodiq hamrohining avlodi bo‘lgan do‘sti Panza bilan birga u o‘z shahrini saqlab qolish uchun kurashadi.
“Bo‘rilar haqida afsona”
Do‘stlik, erkinlik va insonning tabiat bilan aloqasi haqida hikoya qiluvchi sehrli multfilm. Voqealar XVII asr Irlandiyada sodir bo‘ladi, u yerda tabiat va sehr asta-sekin odamlar va ularning qattiq tartiblari tomonidan siqib chiqariladi. Bosh qahramon — Robin ismli qiz, u otasi bilan kichik shaharga ko‘chib o‘tadi. Otasi ovchi bo‘lib ishlaydi va yaqin atrofdagi o‘rmonda yashovchi bo‘rilarni yo‘q qilish topshirig‘ini oladi. Qiziquvchanlik va sarguzashtlarga chanqoq Robin o‘rmonni o‘rganishga qaror qiladi. U yerda u sirli bo‘rilar qabilasidan bo‘lgan Mab bilan uchrashadi. Qor bo‘risi bu — tabiat bilan aloqasini saqlab qolgan holda bo‘riga aylanishi mumkin bo‘lgan odamlardir. Mab va uning to‘dasi o‘rmonni odamlar tomonidan yo‘q qilinishidan himoya qiladi va Robin asta-sekin bo‘rilar dushman emas, balki ajoyib va nozik dunyoning bir qismi ekanligini tushunishni boshlaydi. Bu multfilm tabiat bilan uyg‘unlikni topish va dunyoni nafaqat inson ko‘zi bilan, balki boshqa narsalarni tushunishga tayyor bo‘lgan qalb bilan ko‘rish qanchalik muhimligi haqida gapiradi.
“Oqim”
Tabiat, omon qolish va do‘stlik kuchini ifodalovchi multfilm. Hikoya markazida suv bosgan dunyoga tushib qolgan qora mushuk turadi. Uyi vayron bo‘lgach, u kichik qayiqda safarga chiqadi. Yo‘lda turli hayvonlarga duch keladi: kapibara, lemur, retriver it va g‘alati kotib qush. Ular tamoman boshqa-boshqa bo‘lsalar-da, qiyinchiliklarni yengish uchun bir-birlariga ishonishni va birgalikda ishlashni o‘rganishlari lozim. Ularning safari kutilmagan kashfiyotlar, xavf-xatarlar va do‘stlik hamma narsadan ustun keladigan lahzalarga to‘la. Ushbu multfilm so‘zsiz bo‘lishi bilan ajralib turadi. “Oqim” nafaqat tabiat go‘zalligi va qudratini namoyish etadi, balki dunyo inqirozga yuz tutganda hamjihatlikning ahamiyatini ham eslatadi.
“Orion va Zulmat”
Dunyodagi deyarli barcha narsadan qo‘rqadigan, lekin hammasidan ham qorong‘ilikdan cho‘chiydigan Orion ismli bola haqidagi ta’sirli hikoya. Uning hayoti tashvishlarga to‘la va u o‘ziga qo‘rqinchli tuyulgan hamma narsadan qochadi. Ammo bir kuni uning asosiy qo‘rquvi — Zulmat uning uyiga mehmonga kelganda hammasi o‘zgaradi. Zulmat qo‘rqinchli maxluq emas, balki g‘ayrioddiy va mehribon mavjudot ekan. U Orionga o‘zining qo‘rquvlarini bartaraf etish uchun ajoyib sayohatga chiqishni taklif qiladi. Ular birgalikda sirli va g‘ayrioddiy joylarga tashrif buyurishadi, bu yerda bola ilgari uni eng ko‘p qo‘rqitgan narsalarga duch keladi. Bu multfilm qo‘rquvlarni qabul qilish, ularni yengishni o‘rganish va hatto ilgari faqat zulmat ko‘ringan joylarda ham dunyoning go‘zalligini kashf etish qanchalik muhimligi haqida.
Izoh (0)