Aktrisa Halima Ibragimovaning ijodidan ko‘ra, feʼl-atvori ko‘plab muhokamalarga sabab bo‘lardi, desak mubolag‘a bo‘lmaydi. To‘g‘ri, u shirinsuxan ayol emasdi, ammo adolatsizlik va nohaqlikka chidolmasdi. U sadoqatni qadrlaydigan, xiyonatni kechirmaydigan, mard va tanti inson edi.
U qanday oilada tug‘ilgan?
Aktrisa Halima Ibragimova 1979-yili Ubaydulla va Munira Ibragimovalar oilasida uchinchi qiz farzand bo‘lib dunyoga kelgan. Oilada o‘g‘il farzand bo‘lmagani uchun to‘rt qizning bari uy-ro‘zg‘or ishlariga usta qilib tarbiyalangan.
— Bolaligim juda ajoyib o‘tgan. Rahmatli otamning mahalla-ko‘yda hurmati baland edi. Ubaydulla akaning qiziman, desam hamma tanirdi. Chunki otam yuqori lavozimda ishlagan, qo‘lidan kelgan yordamini ayamaydigan, saxiy inson bo‘lgan. Onam esa to‘rt qizining tarbiyasi bilan band edi. Otam hamisha ko‘nglimizga qarar, og‘zimizdan chiqqanini muhayyo qilardi. Onam esa aksincha, nihoyatda qattiqqo‘l va hamma qizidan uy ishlarini qilishni talab qiladigan ayol edi. Otam kechasi ko‘chada yurishimizni istamasdi, soat oltidan keyin hech kim ko‘chaga chiqmasdi.
Bolaligimda sanʼatga umuman qiziqish bo‘lmagan, prokuror bo‘laman deb niyat qilardim. Shu sabab uch marta huquqshunoslik kollejiga ham o‘qishga topshirganman. Ammo qabul qilishmagan, deydi aktrisa.
Ubaydulla Ibragimov dastalab qurilishda oddiy ishchi bo‘lib ishlagan, undan keyin uzoq yillar 7-avtokorxonada bosh muhandis lavozimida faoliyat yuritgan.
“Otam qo‘limda jon bergan”
Aktrisa otasining o‘limi bilan bog‘liq voqealarni quyidagicha eslaydi.
— Otam rahmatli 16 yoshimda yurak xurujidan vafot etgan. O‘shanda otam endigina 42 yoshni qarshilagandi. Otam yaxshi pul topadigan inson bo‘lgan. Ammo topganini jamg‘arib qo‘ymay, odamlarga yordam berishni yaxshi ko‘rardi. Zinadan yiqilib tushgani haqida xabar keldi. Keyin bilsak, o‘shanda birinchi infarktni boshdan kechirgan ekan. Oradan ko‘p o‘tmay, yana tobi qochdi. Kasalxonaga birga borganman, otam qo‘limda jon bergan, degandi aktrisa.
Otam davrida oilamiz moliyaviy jihatdan umuman qiynalmagan. Katta yeb, katta ichishga o‘rganib qolganimiz uchun otamning vafotidan keyin ishlashimga to‘g‘ri kelgan. Dadamning tanishlari bozorga ishga joylashtirishdi. U yerda hisobchilikni o‘rgandim.
“Muhtojlikdan uydagi mebellarni sotganmiz”
Halimaning moddiy imkoniyatlari keng bo‘lgani, u qimmatbaho avtomobil boshqargani-yu, dang‘illama uyda yashagani hech kimga sir emas. Ammo aktrisa boy oilada tug‘ilmagandi, u moddiy qiyinchilikni boshdan kechirgan kunlarini quyidagicha eslardi.
— Men turmushga chiqmadim, baxtim ochilmadi. Singlimga xaridor kelib, uni turmushga bergandik. Ammo otamning o‘limidan ko‘p o‘tmay singlim bir bolasi bilan uyimizga qaytib keldi. Uch ayol uydamiz, yosh bolaning ham o‘ziga yarasha xarajatlari bor. O‘ylab-o‘ylab, oxiri “qora bozor”da tirikchilik qilishga majbur bo‘ldim. Chunki vaziyat shu darajaga yetgandiki, ro‘zg‘or uchun uydagi texnika yoki mebellarni sotishni boshlagandik. Sarmoyaga kiritadigan mablag‘im bo‘lmagani uchun boshqalarga ishchi edim. Yaʼni kunlik ishim uchun haq olardim. Undan keyin yetti yil mobaynida “Farhod” bozorida ishlaganman. Bozor meni tarbiyalab, hayot maktabini o‘rgatgan, desam ham bo‘ladi.
“Avval feʼlim bunday emasdi”
Aktrisa asabiy bo‘lib qolishiga atrofdagilar sababchi bo‘lgani haqida ham aytib o‘tgandi.
— Baʼzan asabiylashib, og‘ir gapirib yuborishimni bilaman. Men ham onamning qornidan shunday tug‘ilmaganman. O‘zgarishimga odamlarning o‘zi sababchi bo‘lgan. Bozorda haqqimni talab qilib, baqir-chaqir qilmasam, non topolmasligimni tushunganimdan keyin o‘zgarganman. Bozor katta maydon, unda faqat kuchlilar non topadi. Ishlashni boshlaganimdan keyin oilamizning moliyaviy ahvoli ancha yaxshilangan. Ammo olti yildan keyin onam ham yurak xuruji bilan kasalxonada vafot etgan. Onamdan 22 yoshimda yetim qolganman.
O‘ylab qarasam, bolaligimda pishir-kuydirga qiziqadigan, uydan-ko‘chaga chiqishni istamaydigan qiz bo‘lganman. Bir yiqilarkansiz, ikki yiqilarkansiz, keyin o‘rningizdan turib harakat qilishga majbur bo‘larkansiz. Odamlarga “ho‘p bo‘ladi” deb tavoze qilsangiz, yanchib o‘tib ketisharkan.
“Shukurullo Isroilov to‘yda ko‘rib, qo‘ng‘iroq qilgan”
Bolaligidan sanʼatga qiziqmagan va oilasi ijoddan butunlay yiroq bo‘lgan Halima Ibragimova nega 21 yoshida bu sohaga mehr qo‘ygan?
— Sanʼatkor bo‘lishimda Shukurullo Isroilovning o‘rni katta. Shu boisdan ham u insonni ustozim deb bilaman. Bir kuni to‘yga borganmiz, xizmatga Shukurullo aka kelgan. Qizlar bilan hazil-huzul qilib raqsga tushganman. Harakatlarimni Shukurullo Isroilov kuzatib o‘tirgan ekan. O‘shanda gala-konsertga tayyorgarlik ko‘rishayotgan bo‘lgan. Xullas, to‘yning egasiga qo‘ng‘iroq qilib, mening raqamimni olgan. “Konsertga chiqasanmi?” deganida qo‘rqqanman. Ammo o‘sha paytdagi ruhiy holatimda nimanidir o‘zgartirishim kerak edi. Rozi bo‘lganman, eng qizig‘i, tomoshamiz barchaga manzur bo‘lgan. Ana shundan keyin institutga hujjat topshirganman va Drama aktyorligi bo‘limida tahsil olganman.
“Turmushga chiqish ko‘nglimga sig‘magan”
Aktrisa onasining og‘ir betobligi sabab turmushga chiqolmagani va bir marta sovchi kutgani haqida kulib eslardi.
— Yashirmayman, bir marta 22 yoshimda sovchi kelgan. Ammo rad javobini berganman. Chunki u paytda turmushga chiqish haqida o‘ylab ham ko‘rolmasdim. Onam og‘ir kasal, singlim bilan navbatma-navbat uxlamay onamning oldida o‘tirardik. Shu sabab oila qurish xayolimga ham kelmagan.
Ota-onamning o‘limidan keyin siqilib qolganman. Atrofimdagi insonlarning bari yigitlar edi. Chunki bolalikdan qizlar bilan chiqishmayman. Ular bilan diskotekalarga borardim, sochlarimni ham ulardek kestirib yurardim. 28 yoshimda esa menga oila qurish taklifini berishdi. Avvaliga ustimdan kulyapti, deb o‘yladim.
“O‘zimdan 7 yosh kichik yigitga turmushga chiqqanman”
Aktrisa nega o‘zidan 7 yosh kichik yigit bilan oila qurgani va to‘ydan avvalgi “shartnoma”lar haqida quyidagilarni gapirgandi.
— Turmush o‘rtog‘im katta opamning qo‘shnisi bo‘lgan. O‘g‘il to‘y qilamiz, deb uyni taʼmirlatayotganimizda pochcham hasharga olib kelgan. Avvaliga pochcham “Senga uylanmoqchi”, deganida “Ustimdan kulyapsizmi, hali yosh bola-ku”, deganman. Chunki u paytda men 28 yoshda, turmush o‘rtog‘im esa 21 yoshda bo‘lgan. Keyin qaynonam sovchilikka kelgan. “Baribir oila qurib, farzandli bo‘lishing kerak”, deyishganidan keyin oila qurganman. “Halima eri bilan 10 yilga shartnoma tuzgan, puliga uylangan”, degan gap-so‘zlar mutlaqo asossiz. Bu insonni boshimga musibat tushganida ham sinaganman. Oldimda do‘stlarim qolmaganda, u inson qo‘llab-quvvatlagan.
“Turmush o‘rtog‘imdan sabrni o‘rgandim”
Aktrisa o‘z-o‘zini turmushga bergani va uning feʼl-atvorini qaynona va qaynotasi qanday qabul qilgani haqida so‘zlab bergandi.
— 28 yoshimda o‘zimni o‘zgartirishim qiyin edi. Shu bois turmush o‘rtog‘imga borimcha qabul qilolasizmi, deganman. Soxtalikni yomon ko‘raman, atrofdagilarning ko‘ziga boshqacha bo‘lib ko‘rinolmayman. Turmush o‘rtog‘imni sizlay olmaganman, qaynonamga ham ertalab vaqtli turolmasligimni avvaldan aytganman. Hatto qaynonam rahmatliga “sizni oyijon deyolmayman”, deganim ham esimda.
Turmush o‘rtog‘im og‘ir-bosiq, feʼl-atvorimiz bir-biridan keskin farq qiladi. Undan sabrni o‘rgandim.
“Qizimni asrab olmaganman”
Ijtimoiy tarmoqlarda aktrisa qizini asrab olgani haqida ham mish-mishlar tarqalgandi.
-BkkF3uFy.jpg)
— Ikki farzandimni ham o‘zim dunyoga keltirganman. Bunga faqat shukrona keltiraman. Ammo haqiqatan ham qiz farzand asrab olmoqchi bo‘lganman. Uzoqroq tanishimiz beshinchi farzandga homilador bo‘lgan, eri esa qandaydir jinoyati sabab qamalib qolgan. Ayol beshta bola bilan ijara uyda yashardi. Xullas, u bolani kimgadir berib, ishlash niyati borligini eshitib, yordam qilmoqchi bo‘lganman. Ayol ham, erkak ham bolani berishga rozi bo‘lgan. Bolani uyimga olib kelib, unga alohida xona tayyorlaganman, enaga yollaganman. Mehrim tushib qolgan, uni haqiqatan o‘z bolamdek qabul qilganman. Ammo hamma hujjatlar tayyor bo‘lganida er-xotin aynib qolishgan. O‘ylab qarasam, ularning avvaldan bolani berish niyatlari bo‘lmagan, shunchaki biroz dam olmoqchi bo‘lgan.
“O‘limim haqida eshitganda...”
Aktrisa jinoiy javobgarlikka tortilgani, ozodlikdan mahrum etilgani va vafot etgani haqidagi xabarlar 2013-yili yashin tezligida tarqalgan. Aktrisa o‘sha yili boshiga qanday musibat tushganini quyidagicha izohlagandi.
— Oilaviy tadbirkorlik bilan ham shug‘ullanamiz. Opa-singillarimning faoliyati pul ayirboshlash bilan bog‘liq bo‘lgan. Xullas, ular reydga tushib qolgan va hammasini tergovga olib ketishgan. Bu xabarni eshitganimda qo‘rqib ketganman, bolalarimni olib yashirinishga majbur bo‘lganman. Men ota uyimda yashayman, opalarim ham shu uyda ro‘yxatda turishadi. Shu bois uyimizda tintuvlar bo‘lgan. O‘sha paytda kimning do‘st ekanligini bilib olganmiz. Chunki ko‘pchilik o‘zidan itargan, xuddiki biz bilan aloqa qilsa, boshiga bir kulfat tushadigandek tutgan. Eng yomoni, mening o‘lganim haqidagi xabarni opa-singillarim eshitganda shok holatiga tushishgan. Oilamizda ayblanganlar bo‘ldi, ammo men sudlanganim yo‘q. Opa-singlim oilasi bag‘riga qaytgunicha 11 ta bolaga qaraganman. Bolalarning “qachon qaytishadi, ertaga kelishadimi” degan savollari dilimni xun qilardi.
“Tug‘ilganimdan beri shu qomat bilan yashayman”
Aktrisa ijtimoiy tarmoqdagi kuzatuvchilari bilan ko‘p nizoga borishi va buning uchun bir necha marta jazolangani haqida aytib o‘tgandi.
— Men ham odamman, menda ham ko‘ngil bor. Ijtimoiy tarmoqlarga “semiz” deb shunchalik haqoratli so‘zni yozishadiki, chidab bo‘lmaydi. Go‘yoki men qomatimning qandayligini bilmayman, u menga gapirib beryapti. Tug‘ilganimdan beri shu qomat bilan yashayman, bizning oilada ozg‘in insonning o‘zi bo‘lmagan. Keyin turmush o‘rtog‘im va bolalarimni haqoratlab yozishlariga chidolmayman. Mard bo‘lsa, yuzimga gapirsin.
Nimadandir jahlim chiqsa, chidab turolmayman. Konsert paytida Avaz Oxunga, Botirxon Imomxo‘jayevga va Maʼmur Xolmedovga musht tushirganman. Ahad Qayumning yegan kaltagi esa hammaga maʼlum. To‘g‘risi, Maʼmurni urganimga afsuslanaman, chunki yuzida shiram qolib ketgan.
“Qariganimda nabira boqishni istayman”
Halima Ibragimova yetimlikda ulg‘ayib, juda ko‘p qiyinchiliklarni boshdan kechirgan. U intervyularida farzandlarini qabristonga ko‘p olib borishi, o‘lim haqligini his qilishi haqida gapirgan.
— O‘lim haq, har birimiz bir kun bu dunyoni tark etamiz. Faqat Yaratgandan erta jonimni olma, deb so‘rayman. Qariganimda nabiralar boqishni, ularga mehr berishni istayman, degandi marhuma so‘nggi intervyusida.
Izoh (1)
Olgan odamni tinch qoʻyinglar hatyabi qayerga qarasang Halima