Yakunlanayotgan hafta Senat raisi Tanzila Norboyevaning uyiga o‘g‘ri tushgani-yu, blogerlikka da’vogar qizning Qashqadaryo hokimi boshchiligidagi viloyatni yosh blogerlar yordamida “panohiga olmoqchi”ligini aytgani bilan esda qolmoqda. “Daryo” haftaning eng shov-shuvli voqealari ketma-ketligini yodga oladi.
Toshkent shahrining Mirzo Ulug‘bek tumanidagi uylarning biridan 12 ming 500 dollar miqdoridagi pul o‘g‘irlangani xabar berildi. Bu haqda jamoatchilikka ma’lum qilgan Inson huquqlari “Ezgulik” jamiyati raisi Abdurahmon Tashanov uy Senat raisi Tanzila Norboyevaning qiziga tegishli ekanini bildirdi.
“Daryo” manbalari bergan hujjatda Senat raisi xonadoniga o‘g‘rilikka tushgani va 12 ming 500 dollarni o‘g‘irlashda gumonlanayotgani aytilgan ayol IIB xodimlari unga kuch ishlatib, aybni bo‘yniga qo‘yganini yozgan.
Hujjatlarda qayd etilishicha, 37 yoshli gumonlanuvchi D.T. Mirzo Ulug‘bek tumanida joylashgan, maxsus qo‘riqlovga olingan Do‘rmon kompleksidagi 22-uyda enaga sifatida ishlab kelgan. 2-noyabrdan 6-noyabrgacha bo‘lgan navbatchilik vaqtida uydagi javon ichidan uy bekasiga tegishli 12 ming 500 dollarni yashirin ravishda talon-toroj qilganlikda gumon qilingan. Va 2022-yil 26-noyabr kuni gumonlanuvchi sifatida jinoyat ishiga jalb etilgan. Gumonlanuvchiga 2022-yilning 2-dekabr kuni Mirzo Ulug‘bek tumani prokurori iltimosnomasi bilan Jinoyat ishlari bo‘yicha Mirzo Ulug‘bek tumani sudi ajrimiga muvofiq qamoqqa olish ehtiyot chorasi qo‘llanilgan.
2022-yil 5-dekabr kuni soat 6:00 larda meni Dilmurod tergovchi xonasiga olib bordi. U yerda Mirzo Ulug‘bek tuman IIB Jinoyat qidiruv bo‘limi xodimi Bekzod kelib, Dilmurodni tergov bo‘limi xodimi deb aytdi. Dilmurodning xonasi to‘rtinchi qavatga olib chiqdi. U yerda menga avval yaxshi gapirishdi, keyin Bekzod menga baqirdi va chap oyog‘imni oyog‘i bilan bosdi. Keyin menga jismoniy mashqlar qildirdi va jismoniy zarar yetkazdi. Yelkamga, qo‘limga musht qilib urdi. Keyin menga hozir kiyimingni yech, rasmga olib eringga jo‘nataman, deb majburladi. Men ulardan bu ishni qilmasligini so‘radim, — deydi unga kuch ishlatilganidan shikoyat qilgan ayol.
Keyinchalik 12 ming 500 dollaridan ayrilgani aytilayotgan jabrlanuvchi ariza bergan kunining ertasiga yana huquqni muhofaza qiluvchi organga murojaat qilib, da’vosi yo‘qligini bildirib, arizasini qaytarib olgan. Hamda 12 ming 500 dollardan voz kechgan. Gumonlanuvchi o‘sha kunning o‘zida qo‘yib yuborilgan.
Mazkur haftada shuningdek, elektr energiya tanqisligi va tabiiy gaz yetishmovchiligi sabab faoliyati deyarli to‘xtatilgan metan gaz zapravkalari muammosi va haydovchilarning benzinga bo‘lgan talabi hukumat vakillari, shuningdek shaxsan prezident Shavkat Mirziyoyevni ham tashvishlantirdi. Buning ortidan Ai-80 benziniga nisbatan aksiz solig‘ini bekor qilish haqida prezidentning maxsus qarori ham qabul qilindi.
Natijada Ai-80 rusumli avtobenzin mahsulotining chakana narxi amaldagi narxlarga nisbatan o‘rtacha 8,7 foizga kamayishi prognoz qilindi va “O‘zbekneftgaz”ga qarashli barcha shoxobchalarda shu markadagi benzin 5700 so‘mdan sotila boshlandi.
Benzinning arzonlashishi esa asosan vodiy viloyatlarida, shuningdek Qashqadaryo, Surxondaryo viloyatlari hamda Qoraqalpog‘iston respublikasida AI-80 markali benzinning zapravkalardan yo‘qolib qolishiga olib keldi. Tabiiyki, bu holat hududlarda yo‘lovchi tashuvchi transportlarda yo‘lkira narxi ikki baravarga ortishiga olib keldi.
Davlat rahbari raisligidagi navbatdagi selektorlarning birida Shavkat Mirziyoyev O‘zbekiston hududida muammo bo‘lib turgan elektr energiyasi va tabiiy gaz taqchilligidan xabardorligini ma’lum qildi va bu borada ishonilgan mas’ullar ishonchni oqlamagani sabab xalq muammolarga duch kelayotganini bildirdi. Va zarur choralarni ko‘rmagani uchun 7 nafar rahbarga hayfsan berdi.
Kuni kecha Uchtepani aylanib, pastdagi ahvol bo‘yicha xulosalarimni qildim. Ichki ko‘chalar, uy-joylar oldi tozaligini ham sizlarga prezident aytishi kerakmi? — dedi prezident.
Ushbu haftada tabiiy gaz va elektr energiyasi yetishmovchiligi borasida shikoyat qilayotganlarga qamoq haqida eslatib, tahdid qilgani aytilgan namanganlik deputat “Daryo” muxbiri bilan suhbatlashib, qilmishiga izoh berdi.
Bundan 5 yil avval, 2017-yili 10 oy davomida qamoq ehtiyot chorasida saqlanganman. Sud tugaganidan so‘ng ozodlikka chiqqanman va keyinchalik sudlanganlik holati olib tashlangan. Shundan kelib chiqib, hayotda elektr va gaz tanqisligidan tashqari boshqa tashvishlar ham borligi, ularning oldida bu muammolar u qadar ahamiyatli emasligini nazarda tutib, post qo‘ygandim. Lekin barcha ham meni tanimasligi, o‘tmishimdan xabardor emasligi, boshqacha tushunishlari mumkinligini o‘ylab ko‘rmagan ekanman, — dedi u.
Mazkur haftada shuningdek, Qarshi davlat universitetida tahsil oluvchi talaba qizning yosh blogerlar jamoasini tuzib, Murodjon Azimov boshchiligidagi viloyatni “panohiga olmoqchi”ligini aytgani bilan esda qoldi. Qashqadaryo hokimi bilan muloqotida talaba qiz viloyatda yosh talabalar ishtirokida blogerlar jamoasini tashkil qilib, tanqidchi blogerlarga munosib javob berish taklifini berdi. Bunga javoban viloyat hokimi uni hokimlikka ishga olishini bildirdi. Keyinchalik bu holatga munosabat bildirgan hokimlik axborot xizmati rahbari Ahror Sodiqovning talab qizning gapi shunchaki taklif ekanini aytib chiqdi. “Daryo” muxbiri bilan suhbatlashgan talab qiz esa jamoatchilik uning fikrini noto‘g‘ri talqin qilayotganini aytdi.
Men bu gaplarim — taklifim bilan aynan kimnidir qoralash yoki oqlashni aytmadim. Ba’zi bir holatlarda voqeani bo‘rttirib gapirib, viloyatimiz sha’niga yomon gaplar aytayotgan, bunga huquqi bor yoki yo‘qligini bilmay holatga noto‘g‘ri yondashayotgan blogerlar voqeaga ijobiy yondashish ham kerak degan ma’noda gapirdim, — dedi blogerlikka da’vogar qiz.
Sitora Jalilova shuningdek, jamoatchilikka murojaat qilib, “Yosh qiz oldinga bir qadam tashlab yuraman desa, unga birdan tosh otish yaxshi emas. Hokimimiz mendek oddiy bir talaba qizga imkon berib ko‘ryapti. Bu ishonchni munosib oqlayman. Iltimos, bir-birimizni hurmat qilaylik”, — dedi.
Izoh (0)