Buxoroda qaramog‘iga tashlab ketilgan ikki nafar bolani kaltaklab, ulardan birining umriga zomin bo‘lgan enagaga sud hukmi o‘qildi. Bu haqda “Zo‘r TV” telekanalining “Bu kun” dasturida ma’lum qilindi.
Ma’lum qilinishicha, buxorolik ayolning ikki va uch yoshli qizlarini qaramog‘iga olgan enaga ularni ayovsiz kaltaklab kelgan, badanlariga qizdirilgan jismlarni bosib, qiynoqqa solgan.
2020-yilning 23-dekabridan 25-dekabriga qadar ayol ikki yoshli qizaloqni oshxona pichog‘ining dastak qismi bilan urib, elektr dazmol va oshxona kapgirini qizdirib, shuningdek, gugurt donalarini yoqib, ushbu jismlarni qizchaning tanasiga bosgan. Bundan tashqari, chekayotgan sigaretalarini ham uning badaniga bosish yo‘li bilan jismoniy qiynoqqa solgan. Shu bilan birga, enaga o‘zining jinoiy harakatlarini davom ettirib, qizaloqning tanasining turli sohalariga qo‘llari bilan urib, uning umriga zomin bo‘lgan.
Ko‘z o‘ngida singlisiga qo‘llanilgan qiynoqlar va uning o‘limi qizchaning opasiga ham salbiy ta’sir ko‘rsatgan.
“Boshida aldadim, singling davolanishga Rossiyaga ketdi dedim. Bo‘lmadi baribir, chunki ko‘z oldida o‘lgan bolam. Alday olmadim. Kechqurun uyg‘onib ketib, ‘ukam oldimga kelib o‘tirdi’ deb aytadi… Buni yaxshi qilishning o‘zi bo‘lmayapti, badanidagi dog‘larni men ketkiza olmayman”, — deydi ona.
Sudda enaga Jinoyat kodeksining 110-moddasi 2-qismi “a,v” bandlari, 104-modda 3-qismi “d” bandi bilan aybli deb topilib, 6 yil-u 4 oyga ozodlikdan mahrum etildi.
Eslatib o‘tamiz, 2020-yilning oktabrida Buxoroda 7 yoshli qizaloqni qiynoqqa solib, uning qo‘li va yuzlarini kuydirgan er-xotinga sud hukmi o‘qilgan edi.
Izoh (0)