“O‘g‘limning enagasi bilan xiyonat qildi”. Aktrisa Aziza Yoqubova shaxsiy hayotidagi murakkab vaziyatlar haqida

“Jurnalist” serialidagi roli bilan tanilgan aktrisa Aziza Yoqubova “Chotki TV” kanaliga intervyu berdi. Aktrisa intervyu davomida oilasi, turmush o‘rtog‘ining xiyonati sabab qamalib ketishiga oz qolgani va ikkinchi turmushidan ham ajrashgani sababi haqida gapirdi.

“Erim o‘g‘limning enagasi bilan xiyonat qildi”

Aziza Yoqubova ikki marotaba turmush qurgan, uning birinchi turmushidan bir qizi, ikkinchisidan Muhammad ismli o‘g‘li bor. Aktrisa sobiq ikkinchi turmush o‘rtog‘i va o‘g‘liga yollangan enaga o‘rtasidagi munosabatlar uni qay ahvolga solgani haqida so‘zlab berdi.

— Turmush o‘rtog‘im bilan yarashishga juda ko‘p harakat qildim, ko‘p kechirdim. Ko‘rmay, bilmay, tinch yashay desam ham, Allohning o‘zi erimning xiyonatlarini menga ko‘rsatib qo‘yaverdi. Oilani asrab qololmaganlikda mening ham aybim ko‘p. Erim uxlab qolganda telefonini tekshirardim, shundan hamma narsani bilib qolaverardim. O‘g‘limga qarashi uchun yollangan enaga bor, uyimizdagi liftning oynasidan erimning unga qilgan nojo‘ya harakatini ko‘rib qolganman. Shundan keyin uyimga ham kuzatuv kamerasi o‘rnatdim. Bir kuni enaganing telefonini olib erim bilan yozishmalarini o‘qidim, kiyim-kechak do‘konim bilan ovora bo‘lib uyda yo‘q bo‘lgan vaqtlarimda, bolamning ko‘z o‘ngida juda ko‘p ishqiy sarguzashtlar bo‘lgan ekan. Yana ko‘p yozishmalar bo‘lgan, hammasini ham aytolmayman, deydi aktrisa.

“Qo‘limda pichoq bo‘lgan, qamalib ketishim mumkin edi”

— Shu voqealarni bilib qolganimda enagani o‘ldirib, qamalib ketishimga bir baxya qolgan. O‘sha qizni do‘pposlab urib tashlaganman. O‘sha paytda qo‘limda pichoq bor edi, aqlimni yo‘qotgandim. Hech nima ko‘zimga ko‘rinmadi, o‘ldiraman deb turganimda onamning bir gapi bor edi, ko‘p takrorlardi, shu yodimga tushdi. “Nima bo‘lsa ham o‘zingni yo‘qotib qo‘yma, senga biror kor-hol bo‘lsa, o‘zing qamalib ketasan, bolalaring yetim qoladi, ering shunday ayollardan biriga uylanib ketadi, farzandlaringni ham olib qo‘yadi” derdi. Shu sababgina o‘zimni to‘xtatdim, qo‘limdagi pichoq ham, shukrki, o‘tmas ekan. Erimga shunchalik farqi yo‘qki, men enaga bilan janjallashayotganimda u xotirjam bo‘lib, kulib videoga olib turgan ekan. Buni sezmaganman, keyin shu videoni ko‘rsatib, tarqatib yuboraman deya bir yilgacha tahdid qilib yurdi.

Suratga olish jarayonlarining birida qamoq jazosini o‘tayotgan ayollar bilan gaplashgandim. Aynan qotillik bilan “o‘tirgan”lari bilan gaplashganimda hushim o‘zimda emas edi, qanday pichoq tiqib qo‘yganimni, qanday o‘ldirib qo‘yganimni bilmayman, deyishardi. Biri erini, biri kundoshini, yana kimdir qaynonasini yoki kelinini. Haqiqatan ham shunday bo‘larkan, ayollar atayin bunday qilmasligini o‘zim xuddi shu vaziyatga tushib bildim, deydi Aziza Yoqubova.

“Ajrashmoqchi bo‘lgan ayollarni fikridan qaytarishga harakat qilaman”

— Shu erim bilan to‘rt oy nikoh bilan yashadim, qolgani turli gap-so‘z, keldi-ketdi bilan o‘tgan. O‘z uyimda, o‘zimning pulimga yashardim, farzandlarimni o‘zim boqqanman. Farzandlarim yetim bo‘lmasin, otasiz ulg‘aymasin deya oilamni saqlab qolishga ko‘p rozi bo‘lganman, ammo baribir bo‘lmadi. Instagram’dagi obunachilarim hayotimni bilgani uchun menga ko‘p yozishadi — ajrashmoqchiman, erim xiyonat qilyapti, ammo qanday qo‘lga tushirishni bilmayapman, deya. Shunda yashashga uyingiz bormi, ajrashgach farzandingizni boqa olasizmi, deya so‘rayman. Chunki ajrashib ota uyiga borgan qizni baribir yoqtirishmaydi, kun kelib ortiqchalik qila boshlaydi. Menga yozgan hamma ayollarga ha, ajrashing deb ketavermayman. Qaytanga ularni qaytarishga harakat qilaman. Oilasi jar yoqasida turgan ayol atrofdagilarning, ayniqsa, dugonalarining gapiga quloq solmasligi kerak. “Ana, falonchini qara, ajrashib maza qilib yashayapti. Buni qara, ikkinchi xotin bo‘lib tegib olgan yoki o‘ynash bo‘lib yuribdi” deydigan dugonalar ko‘p, ammo ularga quloq solib shunday qilish eng katta xato, deydi Aziza.

Hozirda hayotimda hech kim yo‘q, bir inson bir yildan beri meni rozi qilishga harakat qilib kelyapti, uni Instagram’dagi obunachilarimga mister X deyman. Hali u bilan hech qanday munosabatim yo‘q, ammo keyinchalik nima bo‘lishi haqida aniq gap aytolmayman, deya ishora qildi aktrisa.