Ko‘pchilik vaqti-vaqti bilan multfilmlar tomosha qilishni yaxshi ko‘radi. Bugungi kunda har qanday did va yosh uchun mos keladigan multfilmlar mavjud. Ana shunday multfilmlardagi xatolarni hamma ham bir ko‘rishda payqayvermaydi.
“Prostokvashino”
Yangi “Prostokvashino”ning ikkinchi epizodida pochtachi Pechkinning velosipedida g‘alati holat yuz beradi. U muzqaymoq yetkazib berishni boshlaydi. Ammo velosipedning egari goh aravachaga yaqinlashadi, goh undan uzoqlashadi — velosiped ramasida ham xuddi shunday holat kuzatiladi.
“Karlson qaytdi”
Enaga Froken Bok Kichkintoyning uyiga kirib kelganida paltosidagi tugma jigarrangligini ko‘rish mumkin. Bir necha kadr o‘tgach, tugma to‘satdan palto rangiga moslashib qoladi, keyinroq esa tugma butunlay g‘oyib bo‘ladi.
Karlsonning ikkinchi qismida ham Kichkintoyning onasi bilan qiziq o‘zgarishlar ro‘y beradi. Uning sochlari to‘satdan och rangga kiradi, multfilmning birinchi qismda bo‘lgan ko‘zoynagi yo‘qolib qoladi.
“Oybola va uning do‘stlari”
Multfilmda Oybola hovuz tubida baliq bilan to‘p o‘ynaydi. Ammo bunday o‘yinchoqlarning odatda ichi bo‘sh bo‘lishiga qaramay, negadir to‘p suv yuzasiga chiqmaydi.
“Uch bahodir dengiz ortida”
Knyaz Vladimir va Yuliy o‘rtasidagi suhbat paytida orqa fonda kontrfors (binolarda devorni mustahkamlab, uning og‘ib ketishiga yo‘l qo‘ymaydigan tirgak) aniq ko‘rinadi. Bir necha soniyadan so‘ng, Po‘stdumba arava bilan zalga kiradi va rasmlar orasidagi devor tekis bo‘lib qoladi.
Alyosha Popovichning ko‘ylagi yoqasida uchburchaklarning joylashishi ham birdan o‘zgaradi. Avvaliga qizil rang paydo bo‘ladi va bir necha soniyadan keyin — to‘q sariq. Bu vaqt ichida qahramon kiyim almashtirishga ulgurolmasdi axir.
“Bremenlik mashshoqlar”
Multfilm kadrlariga qarab, podsho o‘naqaymi yoki chapaqaymi, chalkashib ketish mumkin. Bir kadrda u qoshiqni chap qo‘lida ushlaydi, boshqa kadrda esa o‘ng qo‘lida.
“Alyosha Popovich va Tugarin ilonbosh”
Bahodirlar haqidagi franshizaning birinchi multfilmida ham xatolar bor. Umumiy kadr yaqinroq ko‘rsatilganda, Lyubavaning yelkasi va ro‘molidagi tikanlar yo‘qolib qoladi. Uning ortidan kelayotgan kampir ham bu tikanlarni olishga ulgurmay qolardi.
“Dobrinya Nikitich va Zmey Gorinich”
Qirol qo‘shiq aytayotgan qizlarga butalar orasidan mo‘ralab qarayotganda, uning qo‘lidagi hassasi goh paydo bo‘ladi, goh g‘oyib bo‘ladi.
Xuddi shu narsa Uch boshli ajdarning uyida sodir bo‘ladi. Ular kelgan mehmonlar oldiga dasturxon yozadi, har xil taomlarni qo‘yadi. Sabzini qo‘ymoqchi bo‘lgan Uch boshli ajdar stolga o‘girilganda negadir idish bo‘shab qoladi.
“Murvatchalar: Katta sir”
Murvatchalar divanda o‘tirib, televizor ko‘rayotganda Simkaning orqasida turgan taxta bo‘lagiga e’tibor bering. Katta planda u to‘satdan pozitsiyasini o‘zgartiradi, bundan tashqari, yorqin pushti element taxtaning eng yuqori qismida joylashgan.
“Quvnoq do‘mboqchalar”
Ushbu animatsion serialning turli epizodlarida ko‘plab xatolar va kutilmagan burilishlar mavjud. Masalan, “Skameyka” qismida Quyonvoy skameykadan uzoqlashishi bilanoq “Bo‘yalgan” yozuvi yo‘qoladi.
Olov ustidagi qoraygan choynak qanchalik tez toza bo‘lib qolganini payqadingizmi? Ushbu kadrda Qarg‘avoyning bir soniya ichida paypog‘ini almashtirishga ulgurganini ham ko‘rish mumkin. Paypoqdagi chiziqlar qizildan to‘q sariqqa aylanadi, paypoqning rangi esa yashil emas, balki sarg‘ayib ketadi.
“Shahzoda Ivan va bo‘z bo‘ri”
Vasilisa Ivanning oldiga kelganda, qahramonlar orasidagi bo‘shliqda eshikning bir tabaqali ekani aniq ko‘rinadi. Keyingi kadrda ularning bir-birini quchoqlagani aks etgan, shu payt fondagi eshik sirli tarzda qo‘sh tabaqali eshikka aylanadi.
“Qizaloq va maymoq”
“Birinchi uchrashuv” epizodida Ayiq Mashani uydan haydab chiqarganda, yopilgan eshikda og‘ir lo‘kidon va katta mixlar turibdi. Ammo bir necha soniyadan keyin eshik ichkariga ochilganda, yuzasi butunlay silliq bo‘lib qoladi.
Izoh (0)