Tomoshabinlar ijobiy qahramonlarni so‘zsiz yaxshi ko‘rishadi. Biroq aktyor yovuz qahramon rolida shunchalik ishonchli o‘ynab, tomoshabinni qo‘rqita olsa, bu haqiqiy professionallik hisoblanadi. Ayniqsa, ekrandan tashqarida juda yoqimli va mehribon odam antagonist rolini o‘ynasa, bu juda ta’sirli bo‘ladi.
1. Lyutsius Malfoy — Jeyson Ayzeks
Aktyor yovuz qahramonlarni, ayniqsa, Lyutsius Malfoyni ajoyib tarzda ijro etgan. U va ekrandagi oilasi haqida so‘z yuritganda Jeyson Ayzeks “Garri Potter”da Tom Felton gavdalantirgan “o‘g‘li” Drako ekanligini e’tirof etgan. Garri zulmatga qarshi kurashning tabiiy ramzi bo‘lsa, zolim ota tarbiyalagan Drakoning tanlov imkoniyati bor edi. Ko‘pincha aynan Drako oliyjanob ishlarni amalga oshirardi.
Hamkasblari ta’kidlashicha, Jeyson kundalik hayotda g‘oyat mehribon va muloyim inson, ammo suratga olish maydonida bir lahzada ijobiy qahramondan salbiyga o‘ta oladi. Ayzeksni bu qobiliyatlari uchun doktor Jekil va janob Haydga o‘xshatishlari bejiz emas.
2. Joffri — Jek Glison
19 yoshida “Taxtlar o‘yini” serialida suratga tushgan Jek Glison hokimiyatga erishgan shafqatsiz hukmdor Joffri rolini ijro etdi. Yigit personaj xarakterini shunchalik ishonarli tarzda gavdalantirib bergandiki, yosh qirol hanuzgacha kino tarixidagi eng nafratga sazovor salbiy qahramonlardan biri sanaladi.
Xayriya ishlari bilan shug‘ullanuvchi xushfe’l yigit ekrandagi obrazining butunlay aksi.
2014-yilda Jek kinodan ketishini e’lon qilganda, ko‘pchilik buning sababi ta’qib deb o‘yladi. Ammo yosh aktyor shunchaki kasbidan sovigan va osoyishta hayot kechirishni istagandi. Shunga qaramay, u 2023-yilda “Tinch gavan” serialida rol o‘ynab, ekranlarga qaytdi.
3. Mildred Retched — Luiza Fletcher
“Kakku uyasi uzra parvoz” nomli mashhur drama chiqqanidan so‘ng, hamshira Mildred Retcheddan butun dunyo nafratlanadigan bo‘ldi. Shafqatsiz ayol obrazi Luiza Fletcherning birinchi katta roli bo‘ldi. Keyinchalik Amerika kino instituti Ratchedni eng buyuk kino yovuzlari ro‘yxatiga kiritdi.
“Star Trek: uzoq koinot 9” serialidagi Luizaning diniy tariqat yetakchisi Kay Vinn rolini ijro etishi Fletcherning shafqatsiz obrazini yanada mustahkamladi.
Fletcherni shaxsan taniganlar esa uni nozik tabiatli, xushmuomala va g‘amxo‘r inson sifatida xotirlashadi. Aytgancha, “Kakku uyasi uzra parvoz” filmi uchun “Oskar” mukofotini qabul qilayotganda Luiza kar-soqov ota-onasiga minnatdorlik bildirib, tomoshabinlarni yig‘latadi — o‘shanda aktrisa imo-ishora tilida so‘zlagan.
4. Saruman — Kristofer Li
Kristofer Lining sevimli kitobi “Uzuklar hukmdori” ekani bejiz emas. Aktyor J.R.R. Tolkinni shaxsan tanigan va keyinchalik, garchi o‘zi ma’nan Yorug‘lik qahramonlariga yaqinroq bo‘lsa-da, Saruman rolini alohida ehtirom bilan ijro etgan. Uning ijodiy faoliyatida graf Drakula, jallod Sanson, Frankenshteyn maxluqi kabi rollar bor. Salobatli aristokrat doimo qora obrazlarga mohirona kirishgan, biroq sahnadan tashqarida u o‘ta madaniyatli inson bo‘lib qolavergan.
Kristofer Li bilan uchrashish baxtiga muyassar bo‘lgan muxlislar ustoz muloqotda naqadar sodda va samimiy bo‘lganini eslaydi: u bir soat davomida muxlis bilan suhbatlashishga vaqt ajrata olar va buni hech qanday kibr yoki manmanliksiz amalga oshira olardi.
5. Dolores Ambrij — Imelda Stonton
Sehrgarlik vazirining o‘rinbosari va shuhratparast Dolores Ambrij rolini Imelda Stonton ijro etishi ma’lum bo‘lgach, bu jozibali ayol ijodining muxlislari tanlovning to‘g‘riligiga shubha qiladi. Ammo “Garri Potter va Qaqnus ordeni” filmida Imeldaning ovozini eshitib, uning sun’iy tabassum-la jilmayishini ko‘rgan zahotiyoq hammasi o‘z o‘rniga tushdi.
Aslida Stonton samimiy va ochiqko‘ngil ayol. Garchi bolalar hali ham ko‘chalarda uning oldiga kelib, nima uchun Garrini shunchalik yomon ko‘rganini so‘rasalar-da, bu aktrisaning mahorati hisoblanadi.
Izoh (0)