O‘zbekiston musulmonlari idorasi huzuridagi Fatvo markazi ChatGPT’dan diniy savollarga javob olish joizmi, savoliga javob berdi.
Keltirilgan ma’lumotga ko‘ra, sun’iy intellekt vositalaridan, jumladan, ChatGPT kabi platformalardan diniy savollarga javob olish amaliyoti shar’iy jihatdan joiz emas. Fatvo markazi bu boradagi e’tiborli jihatlarni alohida ta’kidlab o‘tgan.
Xususan, ChatGPT kabi sun’iy intellekt tizimlari ayrim texnik va umumiy sohalarda ma’lumot berishda foydali bo‘lishi mumkin. Biroq diniy masalalar noziklik va mutaxassislikni talab qilgani bois, bu kabi platformalarning javoblariga suyanish noto‘g‘ri talqinlar va xatolarga olib kelishi ehtimoldan xoli emas.
Qayd etilishicha, ba’zan bu kabi tizimlar diniy savollarga taxminiy javoblar berishi, ayrim hollarda esa, mavjud bo‘lmagan fiqhiy manbalarni yoki asarlardagi noto‘g‘ri ma’lumotlarni keltirishi mumkin. Shuning uchun bunday savollarni faqat shu sohaning bilimdonlari — ya’ni, ishonchli ulamolar va diniy mutaxassislar orqali hal etish zarur ekani alohida ta’kidlangan.
Shu bois Fatvo markazi diniy masalalarda sun’iy intellektga emas, balki malakali ulamolar va mutaxassislarga murojaat etishni qat’iy tavsiya etmoqda.
ChatGPT endi O‘zbekistonda soliq to‘laydi.
ChatGPT chatboti ishlab chiquvchisi 8-aprel kuni Soliq qo‘mitasining elektron xizmat yetkazib beruvchilarning maxsus platformasida hisobga olindi. Bu bilan O‘zbekistonda ro‘yxatdan o‘tgan xorijiy internet kompaniyalari soni 67 taga yetdi.
Ma’lumot uchun, OpenAI tomonidan ishlab chiqilgan ChatGPT sun’iy intellekti 2022-yilning noyabr oyining oxirlarida ommaga taqdim etildi. Atigi besh kun ichida ushbu chat-bot bir milliondan ortiq foydalanuvchini jalb qildi. 2023-yil mart oyida esa OpenAI ChatGPT-4 versiyasini taqdim etdi — bu yangi model matndan tashqari tasvirlarni ham tahlil qila oladi. 2023-yilning noyabr oyidan boshlab O‘zbekiston foydalanuvchilari ham ChatGPT’dan bemalol foydalanish imkoniyatiga ega bo‘ldi.
ChatGPT (Chat generative pre-trained transformer) — OpenAI tomonidan yaratilgan sun’iy intellekt chatboti bo‘lib, turli savollarga javob berishi, dasturchilar uchun kod yozishga yordam berishi, talabalar uchun esa kurs ishlarini yozib berishi mumkin. Bot hattoki she’r va insholar ham yoza oladi. OpenAI’ning asosiy vazifasi inson miyasi bajara oladigan hamma narsani qiluvchi sun’iy intellektni yaratishdan iborat.
Izoh (0)