Tailand 14-iyun kuni qo‘shnisi Kamboja bilan muzokaralar o‘tkazib, uzoq muddatli chegara mojarosini hal qilganini ma’lum qildi. Bu haqda Al Jazeera xabar berdi.
Tashqi ishlar vazirligi maslahatchisi Prasas Prasasvinitchai boshchiligidagi Tailand delegatsiyasi va Chegara ishlari bo‘yicha kotibiyatni boshqaradigan davlat vaziri Lam Chea boshchiligidagi Kamboja kontingenti 14-iyun kuni Kamboja poytaxti Pnompen shahrida nizoni hal qilish uchun uchrashuv o‘tkazgan.
Ikki davlat qo‘shinlari may oyida Kamboja, Tailand va Laos chegaralari tutashgan “Zumrad uchburchak” deb nomlanuvchi hududda otishma uyushtirib, bir nafar kambojalik askar halok bo‘lgan edi. Tailand tashqi ishlar vazirligiga ko‘ra, Qo‘shma chegara komissiyasi yig‘ilishi ikki davlat o‘rtasida o‘zaro anglashuvga olib kelgan.
Vazirlik matbuot kotibi Nikorndej Balankura matbuot anjumanida “diplomatik muloqot eng samarali yo‘l bo‘lib qolayotganini” aytib, asosiy muzokaralar 15-may kuni bo‘lib o‘tishini qo‘shimcha qilgan. So‘nggi kunlarda Tailand Kamboja bilan chegarada nazoratni kuchaytirgan. Kamboja esa o‘z navbatida qo‘shinlaridan to‘liq shay holatga keltirgan.
Ikki davlat ham muammoni hal qilish va millatchilik kayfiyatini yo‘qotish uchun muloqot qilishga va’da berganiga qaramay, Bangkok chegarani yopish va qo‘shnisiga elektr energiyasi yetkazib berishni to‘xtatish bilan tahdid qilgan.
Pnompen Tailand elektr energiyasi, internet o‘tkazuvchanligi va mahsulotlarini sotib olishni to‘xtatishini e’lon qilgan. Shuningdek, mahalliy telekanallarga Tailand filmlarini namoyish etmaslikni ham buyurgandi.
Tailand va Kamboja o‘rtasidagi bahs 1887-yildan 1954-yilgacha Hindiston-Xitoyni fransuzlar bosib olgan davrda asosan 820 km chegara chizilganligi bilan bog‘liq. Quruqlik chegarasining ba’zi qismlari chegaralanmagan va har ikki tomon o‘nlab yillar davomida raqobatlashgan qadimiy ibodatxonalarni o‘z ichiga oladi. Mintaqada 2008-yildan beri vaqti-vaqti bilan zo‘ravonlik sodir bo‘lib, kamida 28 kishi halok bo‘lgan.
Kamboja bosh vaziri Xun Manet shu oy boshida Kamboja Xalqaro sudga 4 ta bahsli chegara hududi, jumladan, so‘nggi to‘qnashuv joyi ustidan shikoyat qilishini ma’lum qilgan edi. Tailand esa ikki tomonlama yechimni talab qilmoqda.
Xun Manet juma kuni Facebook’dagi postida 4 ta hudud va chegara cheklovlari shanba kungi muzokaralarda muhokama qilinmasligini aytgan. Hukumat 15-iyun kuni ishni qo‘zg‘atish rejasi bo‘yicha Xalqaro sudga rasmiy xat yuborishini qo‘shimcha qilgan.
Izoh (0)