Россиянинг Томск вилоятида оғир касалликка чалинган Ўзбекистон фуқароси ватанга қайтарилди. Бу ҳақда “Дунё” АА хабар берди.
Маълум қилинишича, Томск вилоятига ишлаш учун келган фуқаро Б.Х. танасининг бир қисми ишламай қолгани ва мустақил ҳаракат қилиш имкониятидан маҳрум бўлганлиги сабабли ушбу вилоятдаги 2-сонли клиник шифохонага ётқизилган.
Россиялик шифокорлар фуқарога барча зарур тиббий муолажаларни амалга оширди.
Беморнинг аҳволи оғирлиги инобатга олиниб, Бош консулхона ва Миграция агентлиги томонидан унинг Ўзбекистонга қайтиши учун зарур кўмак кўрсатилди ҳамда самолётда ватанга кузатиб қўйилди.
2024 йил август сентябрь ойларида хорижда ота-она қарамоғидан маҳрум бўлган 34 нафар бола Ўзбекистонга қайтарилганди. Октябрь ойида Россияда қаровсиз қолган 8 ойлик чақалоқ Ўзбекистонга, ота-онаси бағрига қайтарилди. Москвадаги вояга етмаган ҳуқуқбузарларни вақтинча сақлаш марказидан 4 нафар бола Ўзбекистонга олиб келинди.
Ўша ойда Туркияда ота-онасининг қаровисиз қолиб кетган уч нафар вояга етмаган бола Ўзбекистонга қайтарилди. Ноябрда Дубайни тарк этиш тақиқланган ўзбекистонлик болага ватанга қайтишига ёрдам берилди. Декабрда Россияда ота-она қарамоғисиз қолган 15 нафар бола Ўзбекистонга қайтарилди.
Шунингдек, Россиянинг Тива Республикаси Оқ Довурак шаҳрида вақтинча ишлаётган ва ҳужжатларини йўқотган тўрт нафар Ўзбекистон фуқароси ватанга қайтарилганди.
2025 йилнинг февраль ойи охирида Россияда икки боласи билан қийин вазиятда қолган аёл Ўзбекистонга қайтарилганди.
Аввалроқ Россиянинг Владивосток шаҳрида оғир тан жароҳати олган Ўзбекистон фуқароси ватанга қайтарилгани ҳақида хабар берилганди.
Изоҳ (0)