Жорий йил 26 июль куни ижтимоий тармоқларда Андижон вилояти Булоқбоши туманидаги Жанубий Фарғона канали заҳарли кўпикка тўлиб оқаётгани ҳақида хабарлар тарқалганди. “Ўзгидромет” ҳолат юзасидан расмий изоҳ берди.
Маълум қилинишича, канал экология ходимлари томонидан текширилган. Ўрганишлар натижасида сувнинг физик ва кимёвий таркиби ўзгаргани аниқланган.
“Сабаби Ширмонбулоқ ҳудудидан ўтган Фарғона канали ёнида тикув-трикотаж фабрикаси жойлашган. Ушбу корхона томонидан қайта ишланган матолар учун фойдаланилган сув каналга ташланган. Оқибатда сувнинг кўриниши ва таркиби ўзгарган. Сув таркибида нитрит ва нитрат тузлари, ишқор ва ранглар аниқланган. Экология масъул ходимлари томонидан муаммо бартараф этилди”, дейилади изоҳда.
Аввалроқ “Дарё” мухбири масалага аниқлик киритиш мақсадида вилоят экология бошқармаси матбуот котиби Лочинбек Исомиддинов билан боғланганди.
Бундан хабаримиз бор. Ходимларимиз сувдан намуна олиб келиб, ўрганиш учун лабораторияга берди. Бу кўпиклар “краска” билан боғлиқ эмас. Катта эҳтимол билан, кимдир “порошок” ташлаган ёки тўкиб юборган деган тахминдамиз. Нафақат Хўжаобод, Булоқбоши туманидаги ходимларимиз, балки бошқа ташкилот ва идоралар ҳам канал бўйлаб синчковлик билан ўрганиш ўтказмоқда. Якуний хулоса бўйича батафсил маълумот берилади, деганбошқарма вакили.
“Андижон сув таъминоти” АЖ эса Telegram каналида ҳудудда ҳеч қандай саноат зонаси мавжуд эмаслигини ёзган ва матнни ўчириб, таҳрирлаган ҳолда қайта эълон қилган.
“Сув юзидаги кўпикнинг ҳосил бўлиши табиий жараён бўлиб, бу сув босимининг тезлиги билан боғлиқ ҳодисадир”, дейилган ўчирилган матнда.
Кейинроқ ҳолат юзасидан Булоқбоши тумани ҳокимлиги ҳам муносабат билдирди. Маълум қилинишича, жараён Андижон вилоят прокуратураси томонидан назоратга олинган. Ўрганиш натижалари бўйича қўшимча маълумот берилади.
Аввалроқ май ойи бошида Булоқбоши туманидан оқиб ўтувчи ушбу Жанубий Фарғона канали қирғоғи ўпирилиб, сув тошиб чиққанди. Талафотлар ўрганилганда жами 560 та хонадонни сув босгани хабар қилинганди.
Изоҳ (0)