Газ ва электр токини беҳуда сарфлаганлар жавобгарликка тортилади — Бош прокуратура

Ўзбекистонда прокурорлар энергоресурслардан беҳуда фойдаланган аҳоли ва тадбиркорларни жавобгарликка тортмоқда. Бу ҳақда Бош прокуратура хабар берди.

Мамлакатда ёқилғи-энергия ресурсларидан беҳуда фойдаланиш билан боғлиқ ҳолатларни аниқлашга қаратилган рейдлар ўтказилмоқда. Хусусан, жорий йил ўтган даврида 1 633 та ҳолатда газ ва электр токидан беҳуда фойдаланишлар аниқланиб, айбдор шахсларга нисбатан маъмурий ишлар қўзғатилган. Шундан 172 та ҳолат Тошкент шаҳрида қайд этилган.

Шаҳардаги “А.Т.” МЧЖга қарашли туристик хизмат кўрсатиш шохобчасида 0,15 кВт қувватдаги электр энергиясидан куннинг ёруғ вақтида фойдаланиш ҳолати аниқланиб, тегишли ҳужжатлар расмийлаштирилган, дейилади манбада.

Қайд этилишича, республикада энергия ресурсларидан беҳуда фойдаланиш ҳолатларининг олдини олиш бўйича 46 983 та профилактик тадбирлар ўтказилган.

“Ҳурматли тадбиркорлар ва фуқаролар, энергия ресурсларидан оқилона фойдаланинг. Назорат органлари томонидан табиий газ ва электр энергиясидан беҳуда фойдаланиш ҳолатларини аниқлаш борасида рейд тадбирлари олиб борилмоқда. Шуни унутмангки, энергоресурслардан беҳуда фойдаланиш учун жавобгарлик мавжуд”, дея огоҳлантирилган истеъмолчилар.

Аввалроқ Бош прокуратура 2025 йил январь—июнь ойларида ёқилғи-энергетикадан фойдаланишда 67 мингдан ортиқ ноқонуний ҳолатлар аниқланиб, 758 млрд сўм зарар ундирилганини маълум қилганди.