Россия президентининг матбуот котиби Дмитрий Песков Россия Бош штаби Бош бошқармасининг “Гавана синдроми” деб аталадиган касалликка алоқадорлиги ҳақидаги айбловларни рад этиб, уларни асоссиз деб атади. Бу ҳақда Euronews хабар берди.
Ҳеч ким ҳеч қачон бу асоссиз айбловлар ҳақида ишончли далилларни эълон қилмаган ёки билдирмаган. Шунинг учун буларнинг барчаси ОАВ томонидан асоссиз айбловдан бошқа нарса эмас, — деди Песков.
Аввалроқ суриштирув олиб борган журналистлар Россия разведкасининг 29155-сонли ҳарбий қисм ходимлари саёҳати ва “Гавана синдроми”га чалиниш ҳолатлари ўртасидаги тасодифий боғлиқлик юзасидан далиллар олишга муваффақ бўлгани айтилган эди.
“Гавана синдроми”нинг икки қурбони журналистлар эътиборини тортган. Улар Россия Бош разведкаси ходимлари экани таъкидланган. Британия ҳукумати Россия разведкаси ходимлари Александр Мишкин ва Денис Сергеевни собиқ россиялик разведка ходими Сергей Скрипалнинг заҳарланишига алоқадорликда гумон қилган.
Шунингдек, Россия разведкасига қарашли Ҳарбий тиббиёт академияси “Гавана синдроми” келтириб чиқарадиган клиник эффектларни ўрганаётгани, разведка гуруҳининг асосий аъзоларидан бири акустик қурол яратиш бўйича ҳукумат буюртмасини олгани айтилган.
“Гавана синдроми”
Касаллик биринчи марта 2016 йилда, Куба пойтахтидаги АҚШ элчихонасида ишлаган бир гуруҳ америкалик дипломатларда бош айланиши, кучли бош оғриғи ва вақтинча эшитиш қобилиятини йўқотиш кузатилганида маълум бўлган.
Дипломатлар ва разведка идоралари бунга Россия, Хитой ёки бошқа давлатларнинг душманона ҳаракатлари сабаблигини гумон қилган. 2023 йил март ойида АҚШ разведка идоралари америкалик дипломатларнинг сирли касалликлари душман кучларининг ҳаракатлари билан боғлиқлигини “даргумон” деб ҳисоблаган.
Изоҳ (0)