Россиянинг Украинага қарши урушида Россия Мудофаа вазирлиги билан шартнома тузмаган иштирокчилар жанговар фахрийлар учун мўлжалланган нафақа ва бошқа давлат ёрдамини олади. Кремль сайтида 25 январь куни эълон қилинган ҳужжатга кўра, президент Владимир Путин Россия ҳукуматига 1 апрелгача қонунчиликка тегишли ўзгартиришлар киритишни топширган.
“Россия федерацияси меъёрий-ҳуқуқий ҳужжатларига ҳарбий ҳаракатларда қатнашган шахсларга махсус ҳарбий операция пайтида жароҳат ёки касаллик олганини тасдиқловчи ҳужжатлар асосида жанговар фахрий мақомини беришни назарда тутувчи ўзгартиришлар киритилсин”, — деб кўрсатилган буйруқда.
“Вагнер” ёлланма аскарлари
Россиянинг Украинага қарши деярли икки йилдан бери давом этаётган уруши пайтида “Вагнер” хусусий ҳарбий компаниясининг кўплаб ёлланма аскарлари Мудофаа вазирлиги билан шартнома имзоламаган. 14 декабрь куни “тўғридан тўғри мулоқот” пайтида собиқ “вагнерчилар”дан бири президентга хусусий ҳарбий компания иштирокчилари томонидан фахрий мақомини олиш имконияти ҳақида савол берди. Путин “вагнерчилар” бошқа барча жанговар ҳаракатлар иштирокчилари каби имтиёзлар ва давлат томонидан қўллаб-қувватланиш ҳуқуқига эга эканини айтди.
“Вагнерчи”ларнинг кўплаб қариндошлари 2023 йилнинг ёзида VK ижтимоий тармоғида “Зашчитники отечества” давлат жамғармаси гуруҳи изоҳларида “Вагнер”нинг аксарият ёлланма аскарларига жанговар фахрий гувоҳномалари берилмаётгани ҳақида шикоят қила бошлади. Ушбу ҳужжатсиз жангчилар давлат томонидан имтиёзлар ва қўллаб-қувватлаш, жумладан, комплекс тиббий, психологик ва ижтимоий реабилитация, санаторий-курортда даволаниш ва юридик ёрдам олиш ҳуқуқига эга бўлмайди.
Изоҳ (0)