Ўзбекистонда миопия, глаукома ва қандли диабет таъсирида келиб чиқадиган кўз касалликлари кўп учрайди. Бу ҳақда кўз шифокори Зулфия Мақсудова “Дарё” мухбири билан суҳбатда маълум қилди.
-c0LUTks9.jpg)
24 май куни Тошкент шаҳрида “Офтальмологияда инновацион технологиялар” мавзусида халқаро конференция бўлиб ўтди. Анжуман Соғлиқни сақлаш вазирлиги, Офтальмологлар ассоциацияси ва Шифокорлар ассоциацияси ҳамкорлигида ташкил этилди. Мулоқотда кўз касалликларини даволашда фойдаланилаётган янги технологиялар ва соҳани ривожлантиришдаги қатор масалалар муҳокама қилинди. Тадбир доирасида Офтальмологлар ассоциацияси раиси, кўз шифокори Зулфия Мақсудова “Дарё” мухбирига интервью берди.
Зулфия Мақсудованинг айтишича, бугун Ўзбекистонда бир нечта кўз касалликлари кенг тарқалган.
“Республикада энг кўп учрайдиган кўз касаллиги – миопия (узоқни кўра олмаслик). Айниқса, болалар орасида узоқни кўра олмаслик касаллиги кундан кун кўпайиб бормоқда. Олдин уларда бу касаллик 6-7 ёшлардан бошлаб кузатилган бўлса, ҳозир анча эрта учрамоқда. Чунки болаларимиз қўлига телефонлар, гаджетларни эрта беряпмиз. Шунинг учун 3-4 ёшдан ҳам миопия бошланяпти. Кейинги кенг тарқалган кўз касаллиги – глаукома, яъни кўз ичидаги босим. Бу кўрликка олиб борадиган касалликдир. Унинг шунақа формалари борки, ҳеч қандай оғриқсиз, аста-секин кўр бўлиб қолиш мумкин. Шунинг учун ҳам беморлар 40 ёшга борганда, албатта ҳар йили шифокорга ўз вақтида кўз босимини ўлчатиб, текширувдан ўтказиб туришлари керак. Агар касаллик эртароқ аниқланса, кўриш қобилиятини сақлаб қолиш мумкин. Афсуски, жуда кўп одамлар кеч, яъни касаллик уч ёки тўртинчи босқичга ўтгандан кейин мурожаат қилади”, — деди мутахассис.
Зулфия Мақсудованинг қўшимча қилишича, мамлакат аҳолисида қандли диабет касаллиги ҳам жуда кўп учрайди. Унинг кўзга бўлган салбий таъсири жиддий оқибатларга олиб келиши мумкин.
“Қандли диабет биринчи навбатда кўз тубидаги майда қон томирларни ишдан чиқаради. Шунинг учун ҳар бир диабет бўлган бемор фақатгина эндокринолог эмас, балки офтальмолог кузатувида ҳам бўлиши керак. Чунки майда қон томирлар ёки янги ўсиб чиққан қон томирлар ёрилиб, кўз тубига қон қуйилиши оқибатида кўриш қобилияти йўқолиши мумкин. Вақтида ўсган, керакциз қон томирларни лазерлар билан куйдириб, қон қуйилишини олдини олиб туриш лозим. Ўзбекистонга янги навигацион лазерлар кириб келди. Улар сунъий онг билан ишлаб, бутун кўз тубини бир неча сонияларда лазер қила олади. Аввал бундай текширувга ярим соатдан 40 дақиқагача вақт кетарди. Қандли диабетга чалинган беморлар бунча вақт бир нуқтага қараб туриши қийин. Ҳозир янги ускуналар ёрдами сабаб бемор кўриги анча осонлашган”, — деди шифокор.
Маълумот учун, анжуманда Ўзбекистонда фаолият юритаётган давлат ва хусусий клиникалар мутахассислари, АҚШ, Буюк Британия, Италия, Испания, Швейцария, Россия, Қозоғистон ва Туркманистондан келган етакчи офтальмологлар иштирок этди. Мулоқот жараёнида офтальмологик ёрдамни ташкил этиш масалалари, глаукома, кўзнинг олдинги сегменти, кўз гавҳари ва орқа сегмент патологиясини даволашда янги технологиялар, офтальмологик диагностикада инновацион ечимлар ва бошқа масалалар муҳокама қилинди.
Изоҳ (0)