Халқаро тадқиқотчи журналистлар гуруҳи америкалик дипломатлар орасида учрайдиган “Гавана синдроми” ва Россия разведка ходимларининг ҳаракатлари ўртасида боғлиқликни аниқлади. Insider, CBS телекомпанияси ва Spiegel журнали суриштирув натижаларини эълон қилди.
Суриштирув олиб борган журналистлар Россия разведкасининг 29155-сонли ҳарбий қисм ходимлари саёҳати ва “Гавана синдроми”га чалиниш ҳолатлари ўртасидаги тасодифий бўғлиқлик юзасидан далиллар олишга муваффақ бўлди.
“Гавана синдроми”нинг икки қурбони журналистлар эътиборини тортди. Улар Россия Бош разведкаси ходимлари экани таъкидланмоқда. Айнан улар америкалик дипломатлар синдром аломатларини (бошда товуш эшитилиши, бош айланиши, мувозанатни йўқотиш) бошдан кечирган жой ва вақтларда бўлган. Шундай операцияларда Россия разведкаси ходимлари Александр Мишкин ва Денис Сергеев иштирок этган бўлиши мумкин. Британия ҳукумати уларни собиқ россиялик разведка ходими Сергей Скрипалнинг заҳарланишига алоқадорликда гумон қилмоқда.
Шунингдек, Россия разведкасига қарашли Ҳарбий тиббиёт академияси “Гавана синдроми” келтириб чиқарадиган клиник эффектларни ўрганаётгани маълум бўлди, разведка гуруҳининг асосий аъзоларидан бири акустик қурол яратиш бўйича ҳукумат буюртмасини олган, дейди журналистлар.
“Гавана синдроми”
Касаллик биринчи марта 2016 йилда, Куба пойтахтидаги АҚШ элчихонасида ишлаган бир гуруҳ америкалик дипломатларда бош айланиши, кучли бош оғриғи ва вақтинча эшитиш қобилиятини йўқотиш кузатилганида маълум бўлган.
Дипломатлар ва разведка идоралари бунга Россия, Хитой ёки бошқа давлатларнинг душманона ҳаракатлари сабаблигини гумон қилган. 2023 йил март ойида АҚШ разведка идоралари америкалик дипломатларнинг сирли касалликлари душман кучларнинг ҳаракатлари билан боғлиқлигини “даргумон” деб ҳисоблади.
Суриштирув олиб борган журналистлар АҚШ расмийлари энди бундай далилларни ўзгартиришга имкон берадиган янги маълумотларга эга бўлишига умид қилмоқда.
Изоҳ (0)