Шавкат Мирзиёевнинг Францияга давлат ташрифи давомида энергетика масалалари муҳокамада асосий ўринни эгаллайди. Бу ҳақда давлат раҳбарининг Францияга ташрифи арафасида мамлакатнинг энг йирик ва нуфузли нашрларидан бири — Le Figaro нашри хабар берди.
Негаки, Франция Ўзбекистон ва Марказий Осиёнинг салоҳиятига катта қизиқиш билдиради, бунда Niger Orano компанияси фаолиятига чек қўйиш билан таҳдид қилаётган шароитда уран захиралари қизиқишнинг муҳим сабаблардан биридир, дейилади мақолада.
Шунингдек, иқтисодий (йиллик ўсиш 6 фоиз) ва демографик (35 миллион кишилик аҳоли йилига 600 мингга кўпаймоқда) ўсиш даврини бошдан кечираётган Ўзбекистонда геосиёсий беқарорлик фонида энергия балансини диверсификация қилиш зарурияти юзага келгани ҳам қизиқиш сабабларидан бири сифатида келтирилган.
Бу борада Россия, Хитой, Осиё, Форс кўрфазидаги ва ғарб мамлакатлари компаниялари қаторида Франция компаниялари ҳамкорликка таклиф қилинмоқда.
Франция билан муносабатларда биз учун муҳим нарса шундаки, улар тўлиқ энергия балансига эга ва уни қандай бошқаришни билади, деб қайд этган энергетика вазири Жўрабек Мирзамаҳмудов Le Figaro нашрига берган интервьюсида.
Нашрнинг қайд этишича, буни Тошкентдаги Франция ишбилармон доиралари вакиллари ҳам тасдиқлайди.
“Францияда энергиянинг барча турлари бўйича барча ишлаб чиқариш жараёнлари борасида тажриба ва ноу-хау билан таъминлаш учун бир қанча ажойиб имкониятлар бор”, деган “Ўзбекистон—Франция” иқтисодий палатаси президенти Жоанна Голас.
Мақолада Ўзбекистонда бир неча йил аввал газ энергия балансининг 85 фоизини ташкил қилгани, аммо ҳозирда газ захиралари камайиб бораётгани, унга талаб эса тез ўсиб бораётгани қайд этилган.
Айни пайтда илғор технологияларни қўллаш орқали табиий газдан самаралироқ фойдаланиш мақсад қилингани, EDF (Франциянинг электроэнергия бўйича давлат компанияси — Électricité dе France) ҳам айнан шуни кўзлаб ҳар бири 1600 мегаватт қувватга эга газда ишлайдиган комбинацияланган электр станцияларини қуриш бўйича иккита лойиҳани амалга ошираётгани таъкидланган.
Қайта тикланувчи энергия борасида ҳам Франциянинг TotalEnergies, Voltalia каби компаниялари Ўзбекистонда лойиҳаларни амалга ошираётгани қайд этиб ўтилган.
Мақолада Ўзбекистонда атом электростанциясини қуриш режалаштирилганига ҳам тўхталиб ўтилган.
Ушбу лойиҳа учун Франция, албатта, бизга энг яхши ечим ва ёрдамни тақдим эта оладиган давлатдир, деган Атом энергетикасини ривожлантириш агентлиги директори Азим Аҳмедхўжаев.
Унинг таъкидлашича, бу борада Франциянинг бир неча компаниялари билан, жумладан, техник ҳамкор сифатида Assystem билан, ўрганиш учун Bureau Veritas билан, электр станцияларини техник бошқариш учун яхши ечимларга эга Framatome билан музокаралар олиб борилмоқда.
Франция томони Марказий Осиёнинг марказида янада самарали фаолият юритиш учун Ўзбекистонда техник мутахассислар ва менежерларини тайёрлашга ўз ҳиссасини қўшмоқчи. Бу борада сентябрь ёки октябрь ойларида ҳамкорликда университет очилиши кутилмоқда.
Шавкат Мирзиёев Францияда 11—13 март кунлари давлат ташрифи билан бўлади. Париж шаҳрида олий даражадаги музокара ва тадбирлар, Франциянинг расмий ва ишбилармон доиралари билан қатор учрашувлар ўтказилиши режалаштирилган. Давлат раҳбари Францияга бундан аввал 2018 ва 2022 йилларда ташриф буюрган. Франция раҳбари Эммануэл Макрон Ўзбекистонга расмий ташриф билан 2023 йилда келган.
Изоҳ (0)