Хитой, Россия ва Эрон март ойининг биринчи ярмида Эроннинг Чобаҳор порти яқинидаги акваторияда “Хавфсизлик боғи-2025” қўшма ҳарбий-денгиз машғулотларини ўтказади.
Хитой машғулотларга халқаро тадбирларда иштирок этган кема — “Баотаоу”ни сафарбар қилмоқчи. У 2025 йилнинг февраль ойида Покистонда бўлиб ўтган “Тинчлик-2025” халқаро машғулотларида иштирок этган эди. Шунингдек, Хитой машғулотларга “Гаою Лейк” таъминот кемасини ҳам юборади.
Машғулотлар, асосан, мамлакатлар ўртасида ўзаро ишонч ва ҳамкорликни чуқурлаштиришга қаратилган. Тадбирлар доирасида денгиз нишонларига ҳужумлар, шикастланишларнинг олдини олиш, шунингдек, қўшма қидирув-қутқарув операциялари машқ қилинади.
2024 йил ноябрь ойи охирида Россия Аэрокосмик кучлари ва Хитой Ҳарбий-ҳаво кучлари Япон ва Шарқий Хитой денгизлари, шунингдек, Тинч океанининг ғарбий қисмида патруллик қилган эди. Сентябрь ойида эса Россия ва Хитой армиялари қўшма ҳарбий-денгиз машғулотларини ўтказди. Октябрь ойида мамлакатлар Тинч океанида ракета ҳужумини қайтариш бўйича ҳам машқ қилди.
“Баотаоу” — Хитой денгиз флотидаги бошқариладиган ракета эсминеци. У Хитойда қурилган ва 2021 йил декабрь ойида фойдаланишга топширилган. Хусусиятлари:
- сиғими: 7500 тонна;
- узунлиги: 161 метр;
- ҳаракатланиш: CОDOG, иккита газ турбинаси ва иккита дизель двигатели билан;
- тезлик: 30 узел.
“Баотаоу” жанговар патрулларда, ўт очиш машғулотларида ва кузатув миссияларида қатнашган.
Изоҳ (0)