Ўзбекистон терма жамоаси ва Москванинг “ЦСКА” клуби футболчиси Аббосбек Файзуллаев фаолиятини Туркия чемпионати вакили — “Башакшеҳир”да давом эттиришга яқин турибди.
Туркия клуби ушбу трансфер учун русларга 7,5 миллион евро тўлайди. Шунингдек, келишувдаги айрим шартлар бажарилса (масалан, Туркия Суперлигасида бир мавсумда 10 та гол уриш ёки Конференциялар Лигасида гол киритиш), қўшимча 2,5 миллион евро миқдорида бонуслар ҳам белгиланган.
Қозоғистоннинг Вести.кз нашри туркиялик инсайдерларга таяниб хабар беришича, Аббосбек Файзуллаев тиббий кўрикдан муваффақиятли ўтган ва яқин кунларда трансфер расман эълон қилиниши кутилмоқда. Унинг маоши эса бир неча баробарга ошади: агар у “ЦСКА”да йилига 100 минг евро олган бўлса, “Башакшеҳир”да бу кўрсаткич 1 миллион евродан ортиқ бўлади. Бундан ташқари, унга қўшимча бонуслар ҳам тўланади.
Изоҳ (0)