АҚШ Украина билан минераллар бўйича келишув билан бирга яна иккита ҳужжат имзоламоқчи. Аммо Киев уларни ўрганиш учун қўшимча вақт сўрамоқда. Бу ҳақда Рейтер агентлиги хабардор манбаларга таяниб маълум қилди.
“Қўшма Штатлар Украинанинг фойдали қазилмалар бўйича келишув билан бирга яна иккита қўшимча ҳужжат имзоланишини истайди. Киев эса бу икки қўшимча ҳужжат устида яна ишлаш керак деб ҳисобламоқда”, дейилади агентлик хабарида.
30 апрель куни Украина бош вазири Денис Шмигал яқин кунлар ичида Украина ва АҚШ ўртасида минераллар бўйича келишув имзоланишини маълум қилди. Унинг сўзларига кўра, келишув Украинада бошқарув ва маблағларни томонлар ўртасида тенг тақсимлайдиган инвестиция жамғармасини ташкил этишни назарда тутади.
Financial Times газетаси Украина расмийларига таяниб, Вашингтон ва Киев шу ҳафтанинг ўзида Украинанинг барча минерал ресурслари, шунингдек, йирик энергетика активларига оид умумий битимни имзолаши мумкинлиги ҳақида хабар берган эди.
Шмигалнинг 27 апрель кунги АҚШ молия вазири Скотт Бессент билан учрашуви якунлари бўйича айтишича, Киев ва Вашингтон илгари тақдим этилган Америка молиявий ёрдами ер ости бойликлари тўғрисидаги келишувда қарз мажбурияти сифатида кўрсатилмаслиги бўйича келишувга эришган.
Нодир металлар бўйича битим имзоланиши февраль ойи охирида, Владимир Зеленскийнинг Вашингтонга ташриф буюрганида барбод бўлди. АҚШ президенти Дональд Трамп Зеленскийни ҳурматсизлик учун койиди, вице-президент Жей Ди Венс киевлик меҳмонни демократлар учун қадрсиз тарғиботчи деб атади. Зеленскийдан жанжал чиққанидан сўнг Оқ уйни тарк этиш сўралди.
Изоҳ (0)