АҚШ уруш сабабли кўрсатилган ҳарбий ёрдам учун Украина қайтариши керак бўлган қарз миқдорини уч баравар камайтирди. Бу ҳақда манбаларга таяниб, Bloomberg хабар берди.
Вашингтон аввалроқ қарзни 300 миллиард долларга баҳолаган бўлса, энди уни 100 миллиард долларга туширди. Қарз миқдорини қайта кўриб чиқишга Украинанинг фойдали қазилмалари бўйича музокаралар туртки бўлган. Вашингтонда ўтган ҳафта охирида АҚШ ва Украина ўртасидаги табиий ресурслар бўйича музокаралар бўлиб ўтди.
АҚШ кўрсатилган ҳарбий ёрдамга жавобан Украина фойдали қазилмаларидан фойдаланиш ҳуқуқини қўлга киритмоқчи. Келишувни февраль ойи охирида тузиш режалаштирилган эди. Шартномани имзолаш учун 28 февраль куни президент Владимир Зеленский бошчилигидаги Украина делегацияси Вашингтонга келди. Бироқ Оқ уйда АҚШ президенти Дональд Трамп ва вице-президент Жей Ди Венс билан жанжалдан сўнг, келишув имзоланмади.
Март ойи охирида эса АҚШ минераллар бўйича келишувнинг янги вариантини тайёрлади. Унда Украинанинг барча фойдали қазилмаларига кириш ҳақида сўз боради. Булар қаторига газ ва нефть ҳам киради. Украина расмийлари бу вариантлардан бири эканини, шартнома муҳокамаси эса давом этаётганини айтди. Зеленский бир неча бор АҚШ томонидан кўрсатилган ҳарбий ёрдамни қарз сифатида тан олмаслигини таъкидлаган.
Келишувнинг ҳозирги таҳририда Украинанинг фойдали қазилмалари, асосий энергетика активларини ўзлаштириши, бўлажак инвестициялар устидан назоратни қўлга киритиши кўзда тутилган. Бундан ташқари, у табиий ресурслардан фойдаланиш билан боғлиқ инфратузилмани қамраб олади: автомобиль ва темирйўллар, қувурлар, портлар ва қайта ишлаш заводлари шулар жумласидандир.
Украинанинг нефть, газ ва фойдали қазилмаларни қазиб олиш бўйича лойиҳаларидан тушган даромадлар икки давлат ўртасида махсус инвестиция жамғармаси томонидан тақсимланади. Шу билан бирга, АҚШ фойдани биринчи бўлиб олади ва инфратузилма лойиҳаларига устувор ҳуқуқларни, шунингдек, ресурсларни учинчи томонларга сотишга вето қўйиш ҳуқуқини сақлаб қолади.
Украина ҳукумати янги лойиҳани аввал эришилган келишув билан солиштирганда “орқага қадам” деб ҳисобламоқда. Уларнинг фикрича, ҳужжат аввал Зеленский томонидан рад этилган дастлабки версияга ўхшайди.
Изоҳ (0)