Қўшма Штатлар миллиардлаб доллар маблағ сарфлаганига қарамай, маҳаллий стартаплар самарали ва арзон учувчисиз аппаратларни ишлаб чиқишга қийналмоқда. Натижада Пентагон технологик ёрдам сўраб Украина компанияларига мурожаат қилмоқда. Бу ҳақда Wall Street Journal хабар берди.
Ҳозирда ҳар икки давлат мудофаа стартаплари ҳамкорлик қилмоқда. Пентагон Украина дрон технологияларини ўз қўшинларига интеграция қилишга қизиқиш билдиряпти.
АҚШ-Украина ҳамкорлиги кучаймоқда
Калифорниядаги CХ2 стартапи асосчиларидан бири Нейтан Минтз буни шундай изоҳлади:
“Ҳеч бир АҚШ компанияси Украинадан ўзиб кета олмаяпти. Уларнинг технологияси самарали ишлайди ва бу тизимлар реал жанг майдонида синалган. Бу юқори даражали лабаратория”.
Яқинда АҚШ Мудофаа вазирлиги Америка-Украина ҳамкорлигидаги иккита лойиҳага узоқ масофали ҳужумкор дронларни синовдан ўтказиш учун шартнома берди. Агар синовлар муваффақиятли якунланса, ушбу дронлар тез орада АҚШ қуролли кучлари инвентарига киритилиши мумкин.
Пентагон Украинанинг етакчи компанияларидан бири Скйфаллъни Қўшма Штатлар ҳарбийлари учун дрон етказиб берувчилар расмий рўйхатига киритди. Ҳозирга қадар 1,5 миллиондан ортиқ жанговар миссияни бажарган ва ҳар куни минглаб учувчисиз қурилма ишлаб чиқарадиган компания бу борада дастлабкиси бўлди.
Skyfall ва CХ2 ҳамкорлигида ишлаб чиқарилаётган бомба ташувчи дронлар хавфсизлик синовларидан ўтса, йил охирига қадар АҚШ қўшинлари томонидан қўлланилиши мумкин.
Украинанинг глобал дрон бозоридаги амбициялари
Украина фақат уруш эҳтиёжларига боғланиб қолмасдан, келажакда глобал дрон саноатининг етакчисига айланишни мақсад қилмоқда. Бунинг учун уларда технологик тажриба ва саноат базаси бор.
Мисол учун, 2023 йилда Украина 2 миллиондан ортиқ дрон ишлаб чиқарган бўлса, жорий йилга келиб бу кўрсаткич 4,5 миллионга етиши кутилмоқда.
Украина дронлари нафақат арзон, балки электрон уруш тизимларига бардошли эканини ҳам намойиш қилган. Шу билан бир вақтда, АҚШ компаниялари ишлаб чиқарган дронларнинг аксарияти Украина уруши шароитида самарадорлик кўрсатмаган, оператор билан алоқа узилиб қолиши каби ҳолатлар кенг кузатилган.
Тўсиқлар ва келажакдаги режалар
Украина ўз эҳтиёжларини ҳисобга олиб, дрон экспортига қатъий тақиқ қўйган. Бу АҚШ билан ҳамкорлик жараёнини секинлаштириши мумкин.
Маҳаллий компаниялар ҳукуматдан чекловларни юмшатишни сўрашмоқда. Чунки ҳозирча Украина ўз армияси учун ишлаб чиқарилган дронларнинг барини сотиб олишга молий жиҳатдан қодир эмас, аммо иттифоқчиларига экспорт қилиш имконияти бор.
Бундан ташқари, Украина дронларининг аксарияти Хитойнинг у ёки бу компонентидан фойдалангани сабабли, Пентагон баъзи қисмларни алмаштириши зарур. Хавфсизлик стандартлари шуни тақозо қилади.
Шунга қарамай, Украина ишлаб чиқарувчилар глобал бозорга чиқиш учун ҳаракат қилмоқда. Сине.Engineering компанияси АҚШ мудофаа пудратчилари билан ишлаш учун ўз фаолиятини Украинадан ташқарида кенгайтиришни режалаштирмоқда.
"Бу жуда катта уруш, шунинг учун биз доимий равишда инновациялар яратишимиз керак", деди компания бош директори Андрей Чулик.
АҚШ ўз дрон флотини модернизация қилишга ҳаракат қилар экан, ечим Силикон водийсидан эмас, балки уч йилдан бери жанг қилиб, қимматли таржиба тўплаган Украинадан топилиши мумкин.
Изоҳ (0)