Ташқи ишлар вазири Бахтиёр Саидов АҚШ давлат котиби Марко Рубио билан учрашув ўтказди. Бу ҳақда у ўз саҳифасида ёзиб қолдирди.
Суҳбат чоғида Ўзбекистон ва АҚШ ўртасидаги муносабатларнинг ҳозирги ҳолати ва истиқболдаги йўналишлари юзасидан ҳар томонлама фикр алмашилди.
Томонлар сиёсий мулоқотни мустаҳкамлаш, савдо-иқтисодий ва инвестициявий ҳамкорликни янада кенгайтириш, минтақавий алоқаларни ривожлантириш, шунингдек, Марказий Осиёда хавфсизлик ва барқарорликни таъминлаш бўйича умумий қарашларни чуқурлаштиришга эътибор қаратган.
Бахтиёр Саидов АҚШнинг Ўзбекистонда амалга оширилаётган ислоҳотлар жараёнини изчил қўллаб-қувватлаётганини юқори баҳолади. Стратегик шериклик доирасидаги юқори даражадаги мулоқот ва амалий ҳамкорликни давом эттириш орқали икки томонлама муносабатлардаги ижобий динамикани қўллаб-қувватлашга келишиб олинган.
Шунингдек, Бахтиёр Саидов Вашингтонда АҚШ президентининг миллий хавфсизлик бўйича маслаҳатчиси Майкл Уолтз билан мулоқот ўтказди.
Учрашув давомида Ўзбекистон ва АҚШ ўртасидаги стратегик шерикликни янада чуқурлаштиришга бўлган содиқлик тасдиқланган. Мулоқот чоғида минтақавий ва халқаро аҳамиятга эга масалалар юзасидан фикр алмашилди.
Кун тартибидан хавфсизлик соҳасидаги ҳамкорликни мустаҳкамлаш, иқтисодий тараққиёт, минтақавий боғлиқлик ва Марказий Осиёда барқарор ривожланишни рағбатлантириш каби масалалар ўрин олди.
Вазир Бахтиёр Саидов АҚШ президенти томонидан Ўзбекистонда амалга оширилаётган ислоҳотлар дастури ҳамда минтақада тинчлик ва фаровонликни таъминлашга қаратилган саъй-ҳаракатларга кўрсатилаётган доимий қўллаб-қувватловни юксак қадрлашини айтди.
Шавкат Мирзиёев 17 март куни Америка Қўшма Штатлари Конгресси аъзоси, Ўзбекистон билан ҳамкорлик бўйича парламент кокуси иштирокчиси Керол Миллер бошчилигидаги делегацияни қабул қилган эди. Унда Ўзбекистон билан АҚШ ўртасидаги стратегик шериклик ва кўп қиррали ҳамкорлик муносабатларини янада ривожлантириш ва кенгайтириш масалалари кўриб чиқилган.
Изоҳ (0)