Ўзбекистон Марказий банкининг олтин-валюта захиралари 2,9 млрд долларга ошиб, рекорд даража — 47,85 млрд долларга етгани маълум қилинди.
Марказий банк эълон қилган ҳисоботда 2025 йил март ойи якунларига кўра, чет эл валютасидаги захиралар 9,5 млрд доллардан 10,4 млрд долларгача ошди. Регуляторнинг халқаро қимматли қоғозлардаги активлари ҳам 202,5 млн доллардан 203,1 млн долларгача кўпайди.
Олтиннинг захиралардаги қиймати 34,9 млрд доллардан 36,9 млрд долларгача кўтарилган бўлса-да, унинг жисмоний ҳажми 12,2 млн дан 11,8 млн троя унсиясигача камайди. Март ойида олтин нархлари 9,6 фоизга ўсиб, ой охирида 1 троя унсияси учун 3,120 долларга етди. Март ойида олтин нархи 9,2 фоизга ошди: 2857,78 доллардан 3120,93 долларгача.
Бу 2013 йилдан буён бутун давр учун рекорд кўрсаткич.
Тарихда илк бор олтин нархи бир унсия учун 3200 доллардан ошди. 2 апрелдаги савдо якунларига кўра, олтин нархи 3166,2 долларни ташкил этди. Бу бир кун олдинги даражадан 0,64 фоизга юқори. Олтин бозоридаги кескин ўсиш АҚШ президенти Дональд Трамп янги импорт божларини эълон қилганидан кейин кузатилди. Ўзбекистон товарларига ҳам 10 фоизлик бож солинмоқда. Баъзи мамлакатларга нисбатан божлар миқдори эса 50 фоизга етган.
Олтин нархи бўйича прогнозлар
Қимматбаҳо металл қиймати 2025 йил аллақачон 21 фоиздан кўпроққа ошди. Ўтган йили олтин қиймати бир қатор омиллар, жумладан, қулай пул-кредит сиёсати ва марказий банкларнинг фаол харидлари, инвесторларнинг хавфсиз активларига бўлган талаби туфайли 27 фоиздан ошганди.
Goldman Sachs каби бир нечта йирик банклар олтиннинг мақсадли нархларини юқорига кўтарди. Goldman Sachs таҳлилчилари йил охирига келиб олтин нархи бир унсия учун 3300 долларга етишини прогноз қилмоқда. Мутахассислар марказий банклар томонидан олтинга бўлган талаб илгари прогноз қилинганидан юқори бўлишини кутмоқда.
Morgan Stanley таҳлилчилари ҳам олтин бозоридаги ўсиш ҳали тугамаганини ва 2025 йилда олтин нархи бир унсия учун 3400 долларга етиши мумкинлигини айтган.
Изоҳ (0)