Қатар Европа Иттифоқининг мажбурий меҳнат ва экологик зарар билан боғлиқ қонунчилигига жавобан LNG (суюлтирилган табиий газ) экспортини тўхтатиш билан таҳдид қилмоқда. Бу ҳақда Доҳанинг Бельгия ҳукуматига юборган мактуби билан танишган Reuters маълум қилди.
Қатар LNG экспорти бўйича АҚШ ва Австралиядан кейин учинчи энг йирик давлат ҳисобланади. Россия Украинага кенг кўламли босқин бошлаган 2022 йилдан бери Европага LNG импортининг 12-14 фоизини айнан ушбу мамлакат таъминлаб келмоқда.
Қатар энергетика вазири Саад ал-Каабий томонидан 21 май куни Бельгия ҳукуматига юборилган мактубда Доҳа ЕИ томонидан ишлаб чиқилган корпоратив барқарорлик бўйича мажбурий текширув (CСДДД) талабларини қабул қилмаслиги ҳақида сўз боради. Ушбу қонун йирик компаниялардан инсон ҳуқуқлари бузилиши ва экологик муаммоларни бартараф этишни талаб қилади.
“Агар CСDDD бўйича қўшимча ўзгартиришлар киритилмаса, Қатар ва QatarEnergy ЕИ ташқарисидаги барқарор ва қулай бозорларни жиддий кўриб чиқишга мажбур бўлади”, дейилади мактубда.
Европа Иттифоқининг позицияси
Еврокомиссия ҳам Қатардан шунга ўхшаш мактуб олганини тасдиқлади. Комиссия вакиллари CCDDDʼни соддалаштириш бўйича музокаралар давом этаётганини билдирди. Таклифлар орасида қонуннинг кучга кириш муддатини 2028 йил ўрталаригача суриш ҳамда компанияларга қўйилган айрим мажбуриятларни қисқартириш кабилар бор.
Қатар нима учун норози?
Мактубдан англашилишича, Қатарни табиатга чиқарилаётган зарарли газ ва бошқа моддаларни Париж иқлим келишуви мақсадларига мос равишда чеклаш талаби энг кўп хавотирга солган.
“Қатар ҳам, QatarEnergy ҳам яқин келажакда нол эмиссияга эришишни режалаштирмаган”, дейилади хатда.
Қатар CCDDDʼнинг ушбу талабини бутунлай бекор қилишни таклиф қилган.
Изоҳ (0)