Ёз — кўнгил очиш, табиатдан завқланиш, яқинлар билан саёҳат қилиш даври. Шу билан бирга, айнан шу фаслда биз одатий ҳолга айланган баъзи зарарли одатларни давом эттирамиз ёки ўзимиз билмаган ҳолда соғлиғимизга путур етказадиган хатоларга йўл қўямиз. Қуйида ёзда кенг тарқалган ва кўпчилик эътибордан четда қолдирадиган хатолар ҳақида сўз юритамиз.
- Болаларга слаш ичимлик таклиф қилиш
Бугунги кунда жуда машҳур бўлган слаш ичимликлар болалар саломатлиги учун хавфли бўлиши мумкин. Баъзи ота-оналар “шакарсиз” деган ёзувга ишониб, болаларига бундай ичимликни олиб беришади. Аслида эса, слаш таркибидаги музнинг тез эриб кетмаслиги учун унга глицерин қўшилади, бу эса бола организмида заҳарланиш аломатларини чақириши мумкин. Бунда қондаги шакар миқдори кескин тушиб кетади, қорни дам бўлади, уйқу босади. Узоқ муддат истеъмол қилинганда янада жиддий муаммолар юзага келади.
Энг яхши ечим — уй шароитида бола билан биргаликда лимонад тайёрлаш. Бу нафақат фойдали, балки фарзандлар билан биргаликда қизиқарли вақт ўтказиш ҳамдир.
- Парфюмдан фойдаланиш
Мутахассислар ёзда атирлардан воз кечишни тавсия қилади, чунки айрим хушбўй ифорлардаги айрим элементлар қуёш нурларига сезувчанликни оширади, натижада терида пигмент доғлари пайдо бўлади. Шунингдек, косметик воситалардаги эфир мойлари ҳам терини яллиғланишга олиб келиши мумкин.
Агар парфюмдан бутунлай воз кечишни истамасангиз, уни фақат қуёш тушмайдиган жойларга сепинг. Атирни кийимга сепиш ҳам мумкин, аммо у баъзи матоларда доғ қолдириши мумкинлигини унутманг.
- Кондиционерни нотўғри созлаш
Кўпчилик кондиционерни нотўғри ишлатиб, электр энергияси сарфини ошириб юборади. Масалан, ташқарида ҳаво ҳаддан ташқари иссиқ бўлса қурилмани жуда паст ҳароратга созлаш энг кенг тарқалган хатодир. Тўғри йўл: ҳароратни унчалик паст бўлмаган даражада ушлаш ва уни ўчириб-ёқиб юрмасликдир. Шунда нафақат доимий салқинлик таъминланади, балки энергияни ҳам тежалади.
Энг муҳими, кондиционер бўлса ҳам, хонани шамоллатишни унутманг. Акс ҳолда нафас олишда қийинчилик, ҳатто сувсизланиш юзага келади.
- Қуёшда югуриш
Ёзда кўпчилик очиқ ҳавода спорт билан шуғулланишга ҳаракат қилади, бироқ иссиқ кунда югуриш спортга эндигина кириб келганлар учун жиддий хавф туғдиради. Ҳатто тажрибали спортчилар ҳам ёзда эҳтиёт бўлишлари керак. Энг тўғри йўл — спорт залига ўтиш ёки машғулот вақтини эрта тонг ёки кечга суриш.
- Ҳашаротларга қарши воситалардан фойдаланмаслик
Репеллентлар (ҳашаротларни ҳайдовчи ва терини ҳимоя қилувчи воситалар) пашша ва чумолиларни ҳамда хавфли касаллик тарқатувчи чивин ва каналардан ҳам ҳимоя қилади. Улардан воз кечиш касаллик хавфини орттириш демакдир.
- Қуёшдан сақловчи кўзойнак ва бош кийимсиз ташқарига чиқиш
Иссиқда бош кийимсиз юриш ва кўзларни ултрабинафша нурлардан ҳимоя қилмаслик соғлиқ учун жиддий хавф туғдиради, шунинг учун ёзда кенг қиррали шляпа, панама ёки сифатли қуёш кўзойнаги бўлиши керак.
Изоҳ (0)