Ёз келиши билан қуёшдан ҳимояловчи кўзойнакка эҳтиёж янада ортади. Аммо ўзимизга кўзойнак харид қилиш учун дўконга борганимизда, дарҳол танлов қийинчилигига дуч келамиз: витринада шакли, материали, линзаларнинг ранги ва ултрабинафша нурлардан ҳимоя даражаси билан фарқ қиладиган кўплаб моделлар бор. Баъзида нафақат чиройли кўринадиган, балки соғлиқни ҳам самарали ҳимоя қиладиган кўзойнакни танлаш жуда мушкул. Шунинг учун биз бу масалани чуқурроқ ўрганишга қарор қилдик.
Ҳаддан ташқари қора кўзойнак — нотўғри танлов
Агар қора кўзойнак сотиб олсангиз, сайр пайтида ҳар сафар кафега янги лимонад ичиш учун кирганингизда уларни ечишга мажбур бўласиз. Кучли қорайтирилган линзалар хоналар учун мўлжалланмаган: бинода бундай кўзойнак тақиш кўзнинг чарчаши, бош оғриғи, кўришнинг хиралашуви ва ёруғликка сезувчанликнинг ортишига олиб келиши мумкин.
Умуман олганда, ҳар қандай қора кўзойнакни хона ичида ва тунда тақиш тавсия этилмайди: бу кўриш қобилиятининг ёмонлашишига сабаб бўлиши мумкин. Бундан ташқари, ҳайдовчилар шуни билишлари керакки, рул бошқараётганда жуда қора кўзойнак тақиш мумкин эмас. Баъзи мамлакатларда бунинг учун жарима ҳам солиниши мумкин.
Мос гардиш (оправа) — бу мода ҳақида эмас, балки саломатлик ҳақида
Ҳамма жойда кўзойнак сизга ярашса, уни тақиш кераклиги айтилади. Баъзан ҳатто бу мавсумда қандай рамкалар урф эканлигини ҳам маълум қилишади. Бироқ, энг муҳими, кўзойнак юзингизга мос келишига эътибор қаратиш лозим, акс ҳолда кўзларингиз зарар кўради. Гардиш кичкина бўлмаслиги, бурундан сирғалиб тушмаслиги ва кўзларингизни имкон қадар яхши ҳимоя қилишига аҳамият беринг. Ултрабинафша нурлар ҳатто кўзойнак линзалари орқали ҳам ўтиши мумкин, аммо аксессуар тўғри танланган бўлса — тушиб кетмаса ва кўзларга етарлича яқин жойлашган бўлса — ултрабинафша нурланишнинг салбий таъсири камаяди.
Қизил линзали кўзойнак
Қуёш кўзойнаги ишлаб чиқарувчилари бизга гардишларнинг кенг танловини тақдим этмоқда, масалан, рангли линзали нусхалари ҳам бор. Аммо шуни ёдда тутиш керакки, қизил кўзойнак чиройли бўлса-да, хавфлидир. Қизил линзаларда ултрабинафша нурларни ютиш қобилияти энг паст бўлиб, улар кўзни самарали ҳимоя қила олмайди. Энг ёмони, улар катаракта касаллигини келтириб чиқариши мумкин. Бундай кўзойнак билан машина ҳайдаш ҳам тавсия этилмайди: линзаларнинг қизил ранги йўлдаги белгиларни идрок этишни ўзгартиради. Баъзи ҳолларда бу ҳатто хавфли вазиятга олиб келиши мумкин.
Умуман олганда, рангли линзалар ҳақида нима дейиш мумкин?
Қизил кўзойнак ҳақида ҳамма нарсани аниқлаган эканмиз, бошқа рангларни ҳам тилга олиб ўтишимиз мумкин. Масалан, яшил кўзойнак кўк нурни филтрлайди ва голф ёки теннис каби табиат қўйнидаги спорт турлари учун жуда мос келади. Сариқ кўзойнак ҳам спортчилар учун қулай бўлиб, уни ҳатто бинонинг ичида ҳам тақиш мумкин.
Кулранг линзалар ялтироқликни камайтиради, айниқса, сувда. Шу сабабли балиқчилар ва кемачиларга бу ажойиб танлов ҳисобланади. Кўк ва бинафша рангли кўзойнаклар эса нарсаларнинг чегараларини аниқроқ кўрсатади. Шунинг учун туманли об-ҳавода жуда қўл келади.
Градиэнтли кўзойнаклар — ажойиб танлов
Бу кўзойнак услубининг ўзига хос линзалари бор. Юқори қисми тўқроқ рангда бўлиб, кўзни қуёш нури ва нурланишдан ҳимоя қилади, пастки қисми эса очроқ, бу эса яқин нарсаларга, масалан, китоб саҳифаларига ёки автомобиль асбоблар панелига диққатни яхшироқ жамлаш имконини беради. Уларнинг қулайлиги айнан икки вазифани бажаришидадир. Ёруғ қуёшда ҳам, қоронғи хонада ҳам ултрабинафша нурларидан ҳимояланган ҳолда ҳамма нарсани кўра оласиз.
Поларизацияланган кўзойнаклар — юлдузчали танлов
Бутун линзага қўлланадиган ноёб кимёвий таркиб туфайли бу кўзойнаклар қуёш нурининг катта қисмини тўсади ва қайтаради. Шуни эътиборга олиш керакки, поларизация қуёш нури билан жуда самарали ишлайди, лекин ултрабинафша нурланишга нисбатан эмас. Кўзларингизни максимал даражада ҳимоя қила оладиган моделлар мавжуд, аммо харид қилишда маълум бир модел буни уддалай олишини аниқлаштириш керак. Поларизациянинг ўзи ҳеч нарсани кафолатламайди.
Гардишнинг материали ҳам муҳим аҳамиятга эга
Қоплама материали саломатликка фақат билвосита таъсир кўрсатсада, тўғри танланган сифатли қопламали кўзойнак узоқ вақт хизмат қилади. Пўлат гардишлар ейилишга чидамли, зангламайди ва ҳатто аллергияга мойил тери учун ҳам мос келади. Бироқ камчиликлари ҳам бор — улар камроқ эгилувчан, бу эса кийиш қулайлигига таъсир қилиши мумкин, шунингдек, бошқа металл гардишларга қараганда оғирроқ. Алюминий гардишлар жуда енгил ва шахсий ўлчамга муаммосиз мослашади. Аммо улар қизиб кетади, бу эса иссиқ кунларда ноқулайлик туғдириши мумкин.
Пластик гардишлар нархи арзонроқ бўлиб, исталган шакл ва рангни танлаш имконини беради. Бироқ улар камроқ хизмат қилади: вақт ўтиши билан синиши ва ранги ўчиши мумкин. Асетат гардиш металлга аллергияси борлар учун ажойиб танлов ҳисобланади. Бундай гардишлар жуда мустаҳкам ва эгилувчан, лекин оддий пластмассага қараганда қимматроқ ва оғирроқ бўлади.
Изоҳ (0)