Профессионал спортчилар тана ва онг саломатлигини мувозанатда сақлашни яхши билади. Бунга эришиш учун улар оғир машғулотлар, қатъий режимлар билан чекланиб қолмайди ва оддий кундалик одатларга амал қилади. Бундай одатлар уларга стрессни камайтиришга, ўзига ишончни мустаҳкамлашга ва ички хотиржамликни сақлашга ёрдам беради. Энг асосийси — бу одатлар ҳаммага бирдек мос келади. Қуйида улардан энг фойдали ва ҳаётингизга осон татбиқ этиладиган бештасини танлаб олдик.
1. Майкл Фелпс — эрталабки сузиш
Майкл Фелпс профессионал сузувчи, у 14 ёшидан бошлаб ҳар куни тонгда бассейнда сузишни одат қилган. “Эрталабки салқин сув бу зарурат, у тана ва онгни уйғотади”, дейди Фелпс интервьюларидан бирида.
Ҳатто 15 дақиқалик сузиш ҳам энергия беради, шишларни камайтиради ҳамда мушакларни таранглаштиради. Бассейнга бориш имкони бўлмаса ҳам, контраст душ билан шунга яқин натижага эришиш мумкин.
2. Серена Уильямс — мақсад ва ҳис-туйғуларни ёзиб бориш
Серена Уильямс кўп йиллардан бери кундалик тутишни одат қилган. Бу спортчи учун нафақат режалар ёзиш воситаси, балки стрессга қарши кураш усули ҳамдир. Унинг сўзларига кўра, мақсадлар ва ҳис-туйғуларни қоғозга тушириб бориш мотивацияни йўқотмасликка ёрдам беради.
Кундалик юритишнинг бошқа афзалликлари ҳам кўп. Унда муҳим режа ва ғояларни ёзиб бориш, хотираларни сақлаш, ижодий фикрларни қайд этиш мумкин. Шунингдек, у асабийликни камайтиришга ёрдам берадиган “чўнтак психолог” ҳамдир.
3. Новак Жокович — нафас олиш машқлари ва медитация
Новак Жокович сербиялик профессионал теннисчи, замонавий теннис тарихидаги энг муваффақиятли спортчилардан бири ҳисобланади. У турнирларида 24 та чемпионликни қўлга киритган ва бу кўрсаткич рекорд ҳисобланади.
Жокович нафақат жисмоний тайёргарлиги, балки ақл-заковати ва интизоми билан ҳам ажралиб туради. Унинг фикрича, медитация хавотир, ғазаб, тортинчоқлик билан курашишда ёрдам беради. Нафас машқлари эса ички ишонч ҳамда енгилликни ҳис қилишга ёрдам беради. Шу сабабли бу одатлар унинг эрталабки кун тартибига киритилган.
4. Усайн Болт — кунни хавотирсиз ва ташвишларсиз бошлаш
Олимпия ўйинлари тарихидаги энг тез югурувчи сифатида танилган Усайн Болт спортдаги фаолиятини якунлаган бўлса-да, жамоатчилик эътиборидан четда эмас. У тонгни осойишталик билан бошлашга одатланган. У ҳар куни бир вақтда уйғонади, душ қабул қилади, енгил машқлар билан шуғулланади ва секинлик билан нонушта қилади. Асосий шарт — эрталаблари шошмаслик ҳамда ўзига қулай муҳит яратиш.
5. Симона Байлз — тонгда хотиржам нонушта қилиш
Спорт тарихининг энг муваффақиятли гимнастикачиларидан бири. АҚШ терма жамоаси аъзоси бўлган Симона Байлз Олимпия ва жаҳон чемпионатларида 30 дан ортиқ медалга эга, шуларнинг аксарияти олтин.
У нонуштага жиддий ёндашади: бу вақтда гаджетларга чалғимайди, суҳбат ёки шошилинч режалар ҳақида ўйламайди. Аксинча, сокин ва тинч муҳитда, фақат ўзи билан ёлғиз қолиб, нонушта қилишни афзал кўради. Байлз таъкидлашича, ана шу дақиқалар унга ички ҳолатини тинглаш, фикрларини тартибга солиш ва кунни омадли бошлаш имконини беради.
Изоҳ (0)