Инсоният минг йиллардан бери зиғирни фойдали хусусиятлари учун қадрлаб келади. Зиғир уруғлари B гуруҳи витаминлари, E витамини, омега-3 ёғ кислоталари, толалар (клетчатка) ва антиоксидантларга бой. Улар юрак-қон томир тизимига, ҳазм қилиш жараёнига ижобий таъсир қилади, шунингдек, қондаги шакар миқдорини нормал ҳолатда сақлашга ёрдам беради.
Зиғир уруғидан олинадиган ёғ ҳам жуда фойдалидир. У осон ҳазм бўлади, юрак ҳамда қон томир соғлиғи учун зарур бўлган кўп тўйинмаган ёғ кислоталарининг манбаи ҳисобланади. Бироқ зиғир ёғи ёруғлик ва иссиқлик таъсирида тез оксидланади, шунинг учун фақат тўғри сақланса фойдали бўлади. Ёғни салқин ва қоронғи жойда, қисқа муддатда сақлаш тавсия этилади.
Уруғ ва ёғ ўртасидаги танлов сизнинг шахсий афзалликларингиз ва мақсадларингизга боғлиқ. Агар сиз толаларга бой маҳсулот излаётган бўлсангиз, бутун ёки майдаланган зиғир уруғини танланг. Уруғларни, сут қўшилмаган бўтқаларга, салатларга ёки пишириқларга қўшиш мумкин. Фойдали моддаларнинг яхши ҳазм бўлиши учун зиғир уруғини истеъмолдан олдин ивитиш (намлаш) тавсия этилади.
Зиғир ёғи эса салатларга қўшиш учун жуда қулай. У нафақат таомнинг таъмини яхшилайди, балки уни фойдали микроэлементлар билан бойитади.
Изоҳ (0)