Иссиқ об-ҳаво юрак-қон томир тизимига ортиқча юклама беради. Қуйида об-ҳавога таъсирчан одамлар учун хавфсиз ёз мавсуми бўйича қўлланма билан бўлишдик.
Тана ҳарорати юқори бўлган шароитда организм совитиш учун қўшимча энергия сарфлайди. Бу томирларнинг кенгайишига олиб келади ва тери орқали иссиқлик чиқаришини оширади. Натижада қон томирлари кенгайиб, қон оқимига умумий қаршилик камаяди, бу эса босимнинг пасайишига сабаб бўлиши мумкин.
Бироқ айрим ҳолатларда, масалан, сув етишмаганда ёки стресс шароитида босим кўтарилиши мумкин. Юқори ҳарорат қоннинг нормал айланишини таъминлаш ва ҳарорат мувозанатини сақлаш учун юракни янада фаолроқ ишлашга мажбур қилади. Жисмоний зўриқиш ёки сув етишмаслиги билан биргаликда босимнинг ошиш хавфи сезиларли даражада ортади.
Иссиқлик туфайли аҳволнинг ёмонлашиш белгилари қуйидагиларни ўз ичига олиши мумкин: бош айланиши ва ҳолсизлик, юрак уришининг тезлашиши, бош оғриғи, нафас қисилиши ҳамда ҳаво етишмаслиги ҳисси, кўнгил айниши ва қусиш, шунингдек, оғир ҳолатларда — тиришиш, ҳушдан кетиш ҳолатлари кузатилади.
Ушбу белгилар аниқланганда тезда тинчланишга ҳаракат қилинг, сув ичинг ва аҳволингиз ёмонлашса, тез ёрдам чақиринг.
Иссиқ об-ҳавога тайёргарлик кўриш бўйича тавсияларга қуйидагилар киради:
Сув мувозанатини сақланг. Юқори ҳароратда тана терлаш туфайли кўп суюқлик йўқотади, шунинг учун сув мувозанатини кузатиб бориш муҳим. Кунига тана вазнининг ҳар бир килограммига камида 30 мл сув ичиш зарур.
Тўғри овқатланинг. Тана стресс шароитида уни зўриқтирмаслик учун витамин ва минералларга бой енгил овқатга муҳтож бўлади. Овқат рационингизга қон босимини меъёрида сақлаб туришга ёрдам берадиган калий ва магнийга бой янги сабзавот ҳамда меваларни қўшиш муҳим.
Мос келадиган кийимлар кийинг. Иссиқ ҳавода табиий матолардан тикилган, ҳавони яхши ўтказадиган кенг кийимлар кийиш мақсадга мувофиқдир. Оч рангли кийимларни танлаганингиз маъқул.
Иссиқдан сақланинг. Соат 11 дан 16 гача, иссиқлик энг юқори бўлган пайтда, очиқ ҳавода тўғридан-тўғри қуёш нури остида қолмасликка ҳаракат қилинг. Бу вақтда ултрабинафша нурланиш даражаси ҳам ортади.
Агар сиз ёки яқинларингиздан бирортасининг аҳволи юқори ҳарорат таъсирида кескин ёмонлашса, салқин, яхши шамоллатиладиган жойга ўтиш, мияга қон оқимини яхшилаш учун оёқларни танадан баландроқ кўтариб ётиш ва сувни кичик қултумлар билан ичиш ҳамда кўрсатмаларга мувофиқ қон босимини меъёрлаштирувчи дори-дармонлар мавжуд бўлса, уларни қабул қилиш, аҳвол жиддий ёмонлашганда эса тез тиббий ёрдам чақириш керак.
Изоҳ (0)