Globo Esporte нашри хабарига кўра, Бразилияда 17 ёшгача бўлган футболчилар ўртасида ўтказилган клублараро мусобақада жанжал юзага келди.
Манбада қайд этилишича, бу мусобақада профессионал ёки расмий ёшлар жамоалари эмас, балки “Сан-Паулу” клубининг медиа жамоасида ўйнайдиган ҳаваскорлар иштирок этган. Ўйин давомида футболчилардан бири ҳакам билан тортишувга киришган, натижада ҳакам унга зарба берган. Бу ҳолат жамоа аъзоларининг кескин норозилигига сабаб бўлиб, майдонда оммавий жанжалга сабаб бўлган.
Воқеага полиция аралашиб, тўрт нафар ўсмир футболчи ва ҳакам ҳуқуқ-тартибот идорасига олиб кетилган. Расмий маълумотларга кўра, ҳолат “таҳдид ва тан жароҳати етказиш” моддалари бўйича қайд этилган.
Мазкур вазият юзасидан “Сан-Паулу” футбол клуби ҳам расмий баёнот берди. Унда воқеа иштирокчилари клубнинг асосий ёки ёшлар жамоасига тегишли эмаслиги таъкидланган. Шу билан бирга, клуб ушбу ўсмирларнинг “Сан-Паулу” формасида ўйнаганини афсус билан қайд этиб, бу ҳолат клуб обрўсига путур етказганини билдирди.
“Сан-Паулу” футбол клуби 17 ёшгача бўлган футболчилар ўртасидаги Interclubes мусобақаси доирасида юз берган воқеани чуқур афсус билан қабул қилади ва кескин қоралайди. Ушбу жамоа клуб аъзолари орасидан шакллантирилган бўлиб, расмий ёшлар тизимига алоқадор эмас. Бироқ ўйинчиларнинг клуб формасида майдонга тушгани бизнинг номимизга салбий таъсир кўрсатди. Биз ҳар қандай зўравонликни қатъиян рад этамиз, дейилади баёнотда.
https://x.com/spfcinfoss/status/1931869857374486757?s=46
Шунингдек, “Сан-Паулу” клуби Interclubes Ассоциацияси томонидан воқеага нисбатан билдирган муносабатни ижобий баҳолади ҳамда ҳолат бўйича барча тегишли идоралар билан тўлиқ ҳамкорликка тайёр эканини маълум қилди. Клуб адолатли ва шаффоф тергов ўтказилишига умид билдирган.
Изоҳ (0)