Мансабдор шахслар томонидан жамият ва давлат манфаатларига жуда кўп миқдорда моддий зарар етказилгани аниқланди, деб хабар бермоқда Коррупцияга қарши курашиш агентлиги.
Унга кўра, Коррупцияга қарши курашиш агентлигига келиб тушган мурожаат асосида олиб борилган хизмат текшируви давомида “Когон ёғ экстракция заводи” акциядорлик жамиятининг собиқ раҳбарлари томонидан қонунбузарлик ҳолатлари содир этилгани аниқланди.
Ўрганиш жараёнида аниқланишича, 2021–2022 йилларда мазкур АЖ томонидан “Ўзсаноатқурилишбанк” АТБ Тўқимачилик бизнес маркази орқали айланма маблағларини тўлдириш мақсадида умумий 30,5 миллиард сўм кредит олинган. Ушбу кредит таъминоти сифатида жамият балансида бўлган, умумий майдони 150,134 кв/м бўлган бино-иншоотлар 50 миллиард сўм қийматида баҳоланиб, гаровга қўйилган.
Текширув натижаларига кўра, мансабдор шахслар олдиндан ўзаро келишган ҳолда кредит олиш жараёнида жамият кузатув кенгаши розилигисиз сохта ва ёлғон маълумотларни расмий ҳужжатларга киритиб, банкка тақдим этган.
Шунингдек, олинган кредит маблағлари самарасиз йўналтирилгани сабабли жамият ва банк тизимига жами 19,6 миллиард сўмга яқин моддий зарар етказилган.
Мазкур ҳолатлар юзасидан Жиноят кодексининг тегишли моддаларига асосан жиноят иши қўзғатилиб, ҳозирда дастлабки тергов ҳаракатлари олиб борилмоқда. Коррупцияга қарши курашиш агентлиги томонидан ишга алоқадор барча шахсларнинг жавобгарлиги масаласи ҳуқуқий тартибда кўриб чиқилмоқда.
- Самарқандда 19 нафар ҳоким ёрдамчиси жиноий жавобгарликка тортилди.
- Жиззахда коррупцияга қарши курашишда масъулиятсизлик қилган раҳбарлар ишдан олинди.
- Ўзбекистонда 21 млрд сўмлик давлат хариди ноқонуний ўтказилишининг олди олинди.
Коррупцияга қарши чоралар
Ўзбекистонда коррупция хавф-хатарларини аниқлаш ва бартараф этиш бўйича янги механизм жорий этилади.
Коррупциявий омилларни аниқлаш ва бартараф этиш бўйича “Андижон тажрибаси” асосида барча ҳудудлар томонидан “йўл хариталари” ишлаб чиқилиб, ижрога қаратилгани, коррупциянинг олдини олиш, айниқса, маиший коррупцияга барҳам бериш, ҳудудларда коррупцияга нисбатан муросасиз муҳит яратиш мақсадида янги механизмларни йўлга қўйиш юзасидан тузилган Республика ва ҳудудий ишчи гуруҳларининг вазифалари бирма-бир таъкидлаб ўтилган.
Ўзбекистонда коррупция жиноятлигига қарамай республика дунёнинг энг коррупциялашган давлатларидан бирилигича қолмоқда. Бу ҳақда Transparency International ташкилоти эълон қилиб келаётган индексларда қайд этилган. Масалан, ташкилотнинг 2024 йилда 180 та давлатни қамраган коррупция рейтингида Ўзбекистон 121-ўринни эгаллаган. Умумий 100 баллик баҳолашдан бор–йўғи 32 балл тўплаган. Жами 50 баллдан паст натижа давлатда коррупция юқори даражада эканини англатади. Шу боис, муаммога қарши курашиш бугун янада долзарб аҳамиятга эга. Президент Шавкат Мирзиёев раислигида ўтказилган йиғилишда бу масала кенг таҳлил қилинди.
Қайд этилишича, ҳозир Ўзбекистонда коррупциявий жиноятларнинг 75 фоизи туман ва маҳаллада маиший коррупция шаклида содир этилмоқда. Жумладан, инфратузилмага уланиш, лицензия олиш, имтиёзли кредит ажратиш, ишга қабул қилиш, малака ошириш каби йўналишларда коррупция омиллари кўп.
Изоҳ (0)