Бразилия прокуратураси Хитойнинг автомобиль ишлаб чиқарувчи BYD компаниясини меҳнат ҳуқуқларини бузганликда айблаб судга берди. Бу ҳақда CNN хабар берди.
Хитой компанияси Бразилияда автомобиль заводини қурмоқда. Унга жалб қилинган ишчилар “қулликка ўхшаш шароитларда” фаолият юритгани маълум қилинган. Бразилия Меҳнат прокуратурасига кўра, даъво BYD ва унинг иккита пудратчиси — JinJiang ва Tecmonta компанияларидан 45 миллион доллар миқдорида маънавий зарар ундиришни назарда тутади. Бундан ташқари, ишчиларга алоҳида компенсация тўлашни талаб қилади.
BYD компанияси бунга жавобан инсон ҳуқуқларига содиқлигини ва Бразилия ҳамда халқаро меҳнат қонунларига ҳурмат билан ёндашишини билдирган. Компания прокурорлар билан ҳамкорлик қилаётгани ва судга расмий ҳужжатлар орқали жавоб беришини таъкидлаган.
Бразилия прокуратураси декабрь ойида Баия штатида BYD пудратчилари томонидан ёлланган 220 нафар хитойлик ишчи “қулликка ўхшаш шароитларда” ишлаётганини аниқлаган. Прокурорларга кўра, улар халқаро одам савдоси қурбонлари ҳам бўлган.
Меҳнат прокурори ўринбосари Фабио Леал учта компания билан музокаралар декабрь ойи охирида бошлангани, бироқ келишувга эришилмаганини айтган. У музокараларнинг муваффақиятсиз якунлангани сабабларини очиқламаган.
Леалнинг таъкидлашича, ишчилар Бразилияга ноқонуний олиб келинган ва уларга ваъда қилинган меҳнат шароитлари яратилмаган. Ҳозирда Хитойга қайтиб кетган ишчилар у ердаги даъво бўйича тўловларни олади. Бразилиядаги компаниялар эса тўловларни тасдиқловчи ҳужжатларни тақдим этиши шарт бўлади. Леал келишувга эришиш мумкинлигини, аммо уни суд орқали ҳал қилиш кераклигини айтмоқда.
Бизнинг даъво аризамиз жуда асосли, тергов жараёнида кўплаб ишончли далиллар тўпланган, деган у.
BYD дунёдаги энг йирик электромобиль ишлаб чиқарувчилардан бири ҳисобланади. Компания Teslaʼнинг асосий рақобатчиларидан бири саналади. BYD маҳсулотларини дунёнинг 70 дан ортиқ мамлакат ва ҳудудларида сотади.
Изоҳ (0)