Ҳиндистондаги авиаҳалокат самолёт двигателларининг ишдан чиқиши оқибатида содир бўлган бўлиши эҳтимоли бор. Ҳиндистоннинг News18 телеканали манбаси Air India самолёти ҳалокати сабабларига оид янги тахминни билдирди.
“Ҳалокатга иккала двигателнинг ишдан чиқиши сабаб бўлган бўлиши мумкин”, дейилади хабарда.
Канал суҳбатдошининг айтишича, иккала двигатель ҳам ишдан чиққанда, учувчи диспетчерларга фалокат сигналини юборган. Шу билан бирга, манба якуний хулосалар чиқариш учун ҳали вақт эрта эканини таъкидлаган.
Самолёт ҳалокати сабаблари бўйича тергов давом этмоқда. Илгари борт ҳалокатининг эҳтимолий сабаблари сифатида учувчининг хатоси ёки қушлар билан тўқнашув кўрсатилганди.
Ҳиндистоннинг аҳоли яшайдиган ҳудудида самолёт ҳалокатга учрагани ҳақида 12 июнь куни маълум бўлди. Самолёт бортида 242 киши бўлган, улардан фақат биттаси — 11А ўриндиғида ўтирган йўловчи омон қолган. Самолёт ётоқхона биносига қулагани сабабли талабалар орасида ҳам жабрланганлар бор - дастлабки маълумотларга кўра, 50 киши, яна беш кишини қутқариб қолишнинг иложи бўлмаган. Шунингдек, ижтимоий тармоқларда ҳалокат лаҳзаси ва воқеа жойидан олинган видеолар пайдо бўлди.
Президент Шавкат Мирзиёев Аҳмадободда юз берган авиаҳалокат оқибатида кўплаб инсонлар ҳалок бўлгани ва жиддий жароҳат олгани муносабати билан Ҳиндистон президенти Драупади Мурму ва бош вазири Нарендра Модига таъзия мактуби йўллади.
Изоҳ (0)