Бразилия жануби-шарқидаги Сан-Паулу штатида кучли ёмғирлар оқибатида 36 киши ҳалок бўлди, деб хабар бермоқда Globo маҳаллий маъмуриятга таяниб.
Жабрланганлардан бири — етти ёшли қизча Убатуба муниципалитетида, ўзи яшаб турган уй устига оғирлиги 2 тонна тош қулаши оқибатида ҳалок бўлган. Сан-Себастьян муниципалитетида яна 35 киши ёғингарчилик қурбонига айланган.
Бундан ташқари, штат ҳукумати маълумотларига кўра, ёмон об-ҳаво туфайли 228 киши уйларини тарк этишга мажбур бўлган. Яна 338 нафар маҳаллий аҳоли бошпанасиз қолган. Сан-Себастьян раҳбари Фелипе Аугустонинг сўзларига кўра, муниципалитетда 50 та уй қулаган. Сан-Паулунинг айрим ҳудудларида алоқа, электр ва сув узилиб қолди, деб ёзмоқда Globo.
Одамларни қидириш билан авиация ва ўт ўчирувчи гуруҳлар шуғулланмоқда. Убатуба, Сан-Себастьян ва уларга қўшни бир қанча муниципалитетларда фавқулодда ҳолат эълон қилинди. Бразилия президенти Луис Инасиу Лула да Сильва 20 февраль куни жабрланган муниципалитетларга ташриф буюриши режалаштирилган.
Январь ойидан бери Сан-Паулуда ёмғир ёғмоқда. Ўтган ой штатда 378,6 мм ёғингарчилик кузатилди — бу одатий меъёрдан 30 фоиз кўп. 18 февраль куни кечқурун штатда яна бир катта жала бошланди.
Изоҳ (0)