Каталония билан Париж орасида. Ҳам «Барселона», ҳам «ПСЖ» сафида ўйнаган футболчилар

Лионель Месси «Барселона»ни эркин агент сифатида тарк этди ва Франциянинг «ПСЖ» жамоаси билан шартнома имзолади. Парижликлар сўнгги йиллардаги энг йирик иккинчи трансферни амалга оширди, бунисида ҳам «Барселона» вакили олиб келинди. Ушбу мақолада иккала жамоа сафида ҳам тўп сурган футболчилар ҳақида сўз боради.

Фредерик Дею (Франция)

• «Барселона» (1999—2000): 11 ўйин, 1 та гол
• «ПСЖ» (2000—2004): 118 ўйин, 6 та гол

Франциялик ҳимоячилар «Камп Ноу»да доим ҳам ўзини кўрсата олмайди. 90 йилларда Лоран Блан Каталонияга келган эди, аммо бир мавсумдан сўнг «Барселона»ни тарк этган. «Ланс»нинг узоқ йиллик етакчиси Фредерик Деюдан ҳам кўп нарса кутилганди. Француз жуда оз муддат ўйнади, «Барселона» мухлислари уни унутиб ҳам юборди, лекин «кўк-анорранглилар» Деюнинг ортидан яхшигина пул ишлаб олди. Эркин агент сифатида Каталонияга ташриф буюрган Фредерик бир йилдан сўнг 6 миллион евро эвазига «ПСЖ» жамоасига ўтди. Парижда Деюнинг ишлари юришиб кетди. Тўрт мавсум парижликлар шарафини ҳимоя қилган ҳимоячи Франция Кубогини қўлга киритишга муваффақ бўлди.

Микель Артета (Испания)

• «Барселона» (1997—2000): ёшлар жамоасида ўйнаган
• «ПСЖ» (2000—2002): 53 ўйин, 5 та гол

Артета «ПСЖ»га «Барселона»нинг иккинчи жамоасидан икки йиллик ижара асосида ўтган. У ерда Роналдиньо билан бирга ўйнаган Микель анча тажриба тўплади ва икки йилдан кейин каталонияликлар футболчини «Глазго Рейнжерс»га 8 миллион еврога сотиб юборди. Артета фаолиятининг энг ёрқин дамларини «Туманли Албион»да ўтказди. Парижда тажриба тўплади, «Барселона» сафида бирор марта майдонга тушмаган бўлса-да, жамоага молиявий томондан ёрдами тегди.

Роналдиньо (Бразилия)

• «ПСЖ» (2001—2003): 55 ўйин, 17 та гол
• «Барселона» (2003—2008): 207 ўйин, 94 та гол

«Барселона» ва «ПСЖ»да тўп сурган футболчилар ичида энг асосий юлдузлардан бири. «Олтин тўп» эгаси Европага саёҳатини Париждан бошлаган. Хоан Лапорта президентлик сайлови олдидан «Манчестер Юнайтед»дан Дэвид Бекҳэмни олиб келишга ваъда берганди, аммо «Реал» чаққонлик қилиб инглиз футболчисини ўз сафига қўшиб олгач, бутун диққат Роналдиньога қаратилди. Роналдиньонинг фаолиятидаги энг юқори ноталар айнан испан жамоаси сафида бўлди.

Максвелл (Бразилия)

• «Барселона» (2009—2012): 90 ўйин, 2 та гол
• «ПСЖ» (2012—2017): 214 ўйин, 13 та гол

Бразилиялик футболчи Златан Иброҳимовичнинг яқин дўсти. Максвелл швециялик ҳужумчи билан «Аякс», «Интер» ва «Барселона»да бирга тўп сурган. Златаннинг илтимосига кўра Максвелл Парижга йўл олди. «ПСЖ» бу трансфердан афсусланмади. 3,5 миллион еврога харид қилинган ҳимоячи парижликлар сафида икки юздан ортиқ ўйинда иштирок этди. Швециялик дўстидан фарқли равишда Максвелл «Барселона» билан 2011 йилда Чемпионлар Лигасида зафар қучган.

Люка Дин (Франция)

• «ПСЖ» (2013—2016): 44 ўйин
• «Барселона» (2016—2018): 46 ўйин, 2 та гол

Люка Дин Париж жамоасига мослаша олмади. 2 мавсум захирада ўтирганидан сўнг, «Рома»га ижарага бериб юборилди. 2016 йилда «Барселона» футболчини харид қилди. Аммо каталонлар сафида Хорди Альба борлиги сабаб Люка Дин у билан рақобат қила олмади. Испаниялик футболчи ҳар томонлама француздан устун эди. «Барселона»да ўтказган икки мавсумидан сўнг Дин Англияга йўл олди. «Эвертон» франциялик ҳимоячининг янги жамоасига айланди.

Ришар Дютруэл (Франция)

• «ПСЖ» (1991—1996): 10 ўйин
• «Барселона» (2000—2002): 15 ўйин

Дарвозабон Дютруэл «ПСЖ» тарбияланувчиси ҳисобланади. Аммо асосий жамоадаги 5 мавсум давомида Бернар Ламани рақобатда енга олмади. Янги жамоа излаш вақти келганини билган Ришар Испаниянинг «Сельта» жамоасига ўтади. «Барселона» дарвозабоннинг Вигодаги ажойиб ўйинларидан сўнг сотиб олишни мақсад қилди. Каталонияликлар сафида ҳам Дютруэл ўз ўрнини топа олмади. Виктор Вальдес асосий дарвозабон бўлишини билгач, Ришар «кўк-анорранглилар» сафини тарк этди.

Хуан Пабло Сорин (Аргентина)

• «Барселона» (2003): 15 ўйин, 1 та гол
• «ПСЖ» (2003—2004): 21 ўйин, 1 та гол

Аргентиналик футболчи 2002/03 йилги мавсумнинг иккинчи қисмини «Барселона»да ўтказди. Кейин эса «ПСЖ»га ўтди. «Крузейро» Хуан Паблони Европа сафарига юборган эди. Каталония ва Париж жамоаларидан аввал Сорин «Ювентус» ва «Лацио»да ҳам ўйнашга улгурган. Лекин жанубий америкалик футболчини ҳеч бир клуб ўз сафида олиб қолишни истамаган. Фақатгина «Вильярреал» унга шартнома таклиф қилди.

Людовик Жюли (Франция)

• «Барселона» (2004—2007): 124 ўйин, 26 та гол
• «ПСЖ» (2008—2011): 125 ўйин, 19 та гол

Француз футболчиси иккала жамоа мухлисларининг ҳам ёдида қолган. Жюли «Барселона» билан бирга икки марта Испания чемпионлиги ва бир марта Чемпионлар Лигаси кубогини қўлга киритган бўлса, «ПСЖ» билан Франция Кубогига эга чиққан. «Барселона» билан «ПСЖ» орасида Людовик «Рома» сафида ўйнашга ҳам улгурган.

Тиаго Мотта (Бразилия/Италия)

• «Барселона» (1999—2007): 139 ўйин, 9 та гол
• «ПСЖ» (2012—2018): 229 ўйин, 12 та гол

Тиаго 17 ёшида «Барселона» билан шартнома имзолаган. Аввалига «Барселона Б» жамоасида ўйнаган футболчи кейинчалик асосий жамоага ўтган. Каталониядаги 8 йилидан сўнг Мотта жароҳатлар сабаб рақобатга дош бера олмади ва «Атлетико»га ўтиб кетишга мажбур бўлди. 2012 йилда 11,5 миллион евро эвазига «ПСЖ»га ўтди ва 2018 йилга қадар парижликлар шарафини ҳимоя қилди.

Златан Иброҳимович (Швеция)

• «Барселона» (2009—2010): 46 ўйин, 22 та гол
• «ПСЖ» (2012—2016): 180 ўйин, 156 та гол

Иброҳимович Каталония жамоасига 2009 йилда келиб қўшилди ва дарҳол мослашиб кетди. Аммо кейинчалик Пеп Гвардиола ва жамоа етакчилари билан тил топиша олмагач, «Милан»га кетишга мажбур бўлди. Италиядаги 2 мавсумидан сўнг Златан «ПСЖ»га кетишга рози бўлди. Париж жамоаси афсонасига айланиши учун унга 4 йил кифоя қилди.

Неймар (Бразилия)

• «Барселона» (2013—2017): 186 ўйин, 105 та гол
• «ПСЖ» (2017 йилдан ҳозиргача): 116 ўйин, 87 та гол

Неймар ҳозирги кунда дунёнинг энг кучли футболчиларидан бири. 2013 йилда «Сантос» сафидан «Барселона»га ўтган футболчи Месси ва Суарес билан биргаликда ажойиб учлик ҳосил қилди, кўплаб совринларни қўлга киритди. Кутилмаганда 2017 йил рекорд трансфер (222 миллион евро) эвазига «ПСЖ»га ўтиб кетди. Парижликлар сафида Неймар ўз даражасини намойиш этмоқда. Мбаппе билан биргаликда «ПСЖ» ҳужумида рақибларни ранжитишда давом этяпти.

Дани Алвес (Бразилия)

• «Барселона» (2008—2016): 391 ўйин, 21 та гол
• «ПСЖ» (2017—2019): 73 ўйин, 8 та гол.

Бразилиялик футболчи 2008 йилда «Севилья» сафидан «Барселона»га ўтади. Ўнг қанот ҳимоясида жамоадан эндигина кетган Замброттанинг ўрнини эгаллайди. Алвес «Барселона» сафида ҳам кўплаб совринларни қўлга киритади. Ҳозирги кунда энг кўп совринни қўлга киритган футболчи сифатида эътироф этилаётган Дани Алвес 23 та кубок билан Каталонияни тарк этди. Италиянинг «Ювентус»идаги бир йиллик «саёҳат»дан сўнг Алвес Парижга йўл олади.

«ПСЖ»да ҳам икки мавсум тўп сурган Алвес 6 та совринни ўз ҳисобига ёздириб қўйиб, Парижни тарк этди. 2019 йилда бразилиялик футболчи «Сан-Паулу» билан 3 йиллик шартномага имзо чекди.

Лионель Месси (Аргентина)

• «Барселона» (2003—2021): 835 ўйин, 709 та гол
• «ПСЖ» (2021 йил)

Лионель Месси футбол тарихидаги энг яхши футболчилардан бири. «Барселона» асосий жамоасидаги 18 йили давомида Лионель эришиш мумкин бўлган барча совринларни қўлга киритди. 5 август куни янги шартнома имзолаш учун «Барселона» базасига ташриф буюрган Месси каталонияликлар билан ҳамкорликни тўхтатишга мажбур бўлиши ҳақидаги хабарни эшитди. Ла Лига қоидаларига кўра «Барселона» Лео билан шартнома имзолай олмаслиги маълум бўлди. Эркин агентга айланган Месси парижликлар билан музокара олиб борди ва «ПСЖ» футболчисига айланди.