Муниса Ризаева фарзандини Аргентинада дунёга келтиргани ижтимоий тармоқларда кенг муҳокама қилинган мавзулардан бирига айланди. Айрим вайнерлар ушбу мавзуда қизиқарли видеоларни ҳам суратга олди. Бироқ фарзандини хорижда дунёга келтирган ўзбекистонлик машҳурлар орасида Муниса биринчиси эмас, қуйида шулар ҳақида сўз боради.
Асал Сапарбоева
19 март санасида Littos тахаллуси билан ижод қилувчи спортчи блогер Асал Сапарбоева илк марта она бўлди. У фарзандини Бразилия пойтахти Сан Паулу шаҳрида дунёга келтирди. Асал Бразилия иқлими унга ёққани боис фарзандини дунёга келтириш учун айнан шу мамлакатни танлаганини маълум қилди.
Муниса Ризаева
39 ёшли хонанда Муниса Ризаева 2024 йилда узоқ кутилган оналик бахтига сазовор бўлди. Хонанда турмуш ўртоғи билан келишган ҳолда ўғлини Аргентина пойтахти Буэнос Айресда дунёга кетиришга қарор қилди.
“Биринчидан, Аргентинанинг тиббиёт даражаси дунё бўйича 33-ўринда туради. Иккинчидан, Аргентинанинг катталиги сабаб бу ерда ҳар хил маданиятлар ва ҳар хил об-ҳавони кўриш мумкин. Учинчидан эса, ҳамма билган Месси, Марадона, стейк, фолклор мусиқа, Буэнос Айреснинг ғайритабиий кўча санъати ҳақида билиш менга ҳам қизиқ бўлди. Тўртинчи ва асосий сабаб бу — турмуш ўртоғимнинг хоҳиши бўлди”, деган эди Муниса Ризаева.
Муниса ўғли билан февраль ойида Тошкентга қайтди, у Аргентинадаги тиббиётдан кўнгли тўлмагани ҳақида ҳам сўзлаб берди.
“Боламнинг қорни кўп оғриб, жуда кўп йиғларди. Биз дорихонадан умуман дори сотиб ололмасдик. Чунки дорилар фақат рецепт асосида сотилади. Шифокорга борсак 1 ёшгача ҳеч қандай дори мумкинмас, дейишарди. Шунинг учун ҳам Тошкентга қайтишга мажбур бўлдик”, деди Муниса Ризаева.
Шаҳло Зоирова
Комик актриса Шаҳло Зоирова 2023 йилнинг июль ойида тўртинчи марта она бўлди. Шаҳло ҳам айрим ҳамкасблари сингари ўғлини хорижий мамлакатда — Туркиянинг Истанбул шаҳрида дунёга келтиришни маъқул кўрди.
— Уч фарзандимни табиий йўл билан дунёга келтирганман. Тўртинчи фарзандимда эса соғлиғимдаги ўзгаришлар сабаб шифокорлар кесарча кесиш амалиёти қўлланишини айтишди. Бунинг устига аллергиям қўзиди. Тошкент жуда иссиқ бўлгани учун жуда қийналдим. Шу пайтда дугонам Асал Шодиева агар имкон бўлса, Истанбулга боришимни маслаҳат берди, деган эди Шаҳло Зоирова.
Асал Шодиева
Шоҳруххон ва Асал Шодиева жуфтлиги 2022 йилда иккинчи марта ота-она бўлди. Уларнинг ўғли Истанбулдаги шифохоналардан бирида дунёга келди. Юлдузли жуфтлик ўғлига Бахтиёр деб исм қўйди. Улар фарзандларини ижтимоий тармоқлар орқали кўрсатишмайди. Бироқ актриса ўғилларининг кимга ўхшаши ҳақидаги саволларга жавоб берар экан, тўнғич фарзанди Муҳаммадюсуф дадасига, Бахтиёр эса онасига ўхшашини айтиб ўтган.
Лола
Хонанда Лола 2020 йилнинг ёзида учинчи марта она бўлди. У қизалоғини Москва шаҳрида жойлашган нуфузли клиникалардан бирида дунёга келтирган. Хонанда қизи Аиша билан мунтазам равсиҳда қизиқарли видеолар тайёрлаб, уларни ижтимоий тармоқлардаги саҳифаларига жойлаб боради.
Зарина Низомиддинова
Актриса Зарина Низомиддинова 2020 йилнинг март ойида иккинчи марта оналик бахтига сазовор бўлди. У ўша пайтда турмуш ўртоғининг иши туфайли Россияда яшаётган эди, шунинг учун актриса фарзандини Москва шаҳридаги клиникалардан бирида дунёга келтирган. Чақалоққа Саидумар дея исм қўйилган. Зарина ўғли Саидумарга ҳам алоҳида Instagram саҳифаси очган ҳамда қисқа муддат ичида 100 минг кузатувчи тўплаган эди. У ўғлининг машҳур теннисчи бўлишини орзу қилиши ҳақида сўзлаб берган. Актриса Саидумарнинг теннис машғулотлари акс этган видеоларни мунтазам равишда саҳифасига жойлаб боради.
Ганя Усмонова
Миллиардер Алишер Усмоновнинг жияни, инстаблогер Ганя Усмонова бугунги кунда икки қизнинг онаси. У иккала фарзандини ҳам Москва шаҳридаги клиникада дунёга келтирган.
Изоҳ (0)