Нурсултон Рўзибоев UFC’даги иккинчи жангини кимга қарши ўтказиши маълум бўлди

Ўзбекистонлик MMA жангчиси Нурсултон Рўзибоев (36-8-2) UFC промоушенидаги навбатдаги жангини 4 ноябрь куни UFC Fight Night 230 мусобақасида ўтказади.

Хабарларга кўра, Рўзибоевга Бразилия вакили Кайо Борральо (14-1) рақиб бўлади.

Қайд этиш керак, Борральо 2022 йилнинг 22-октябрь куни ўтказилган UFC турнирида ўзбекистонлик яккакурашчи Маҳмуд Муродов устидан ғалаба қозонганди.

UFC Fight Night 230 мусобақаси Бразилиянинг Сан-Паулу шаҳрида ўтказилади. Мазкур турнирнинг асосий жанги Кёртис Блейдс ва Жаилтон Алмейда иштирокида ўтиши кутилмоқда. Турнир Ўзбекистон вақти билан 4 ноябрдан 5 ноябрга ўтар кечаси бўлиб ўтади.

Нурсултон 2 июль куни UFC’даги дебютини ўтказди. У бразилиялик енгилмас жангчи Бруно Феррейрани (10-1) биринчи раунддаёқ нокаут билан мағлуб этди.

Борральо охирги марта 2023 йилнинг 29 апрель куни Михал Олексейчукга қарши жанг қилиб, уни 2-раундда сабмишен билан енгганди. Бу Кайо учун UFC промоушенидаги 5-жанг бўлади. Бразилия вакили промоушенда ғалабали серия қайд этмоқда.