Бразилиялик машҳур футболчи Кака 35 ёшида фаолиятини якунлади. У аввалроқ «Орландо Сити» сафида бошқа ўйнамаслиги ҳақида айтганди. Энди эса бирйўла футболдан кетаётганини маълум қилди.
Кака 2007 йилнинг 17 декабрида дунёнинг энг яхши футболчиси деб топилган ва «Олтин тўп» билан тақдирланган. Бу йўлда унга Криштиану Роналду ҳамда Лионель Месси рақобатчилик қилганди. Қизиғи, ўша 2007 йилдан кейин Роналду ва Месси «Олтин тўп»ларни ҳеч кимга бермай, 5 мартадан унга эга чиқишди. Ўшанда Кака мен «Олтин тўп»ни қўлга киритган «ерлик сўнгги футболчиман» деган таърифни бериб, Кришти ҳамда Леони кўкка кўтарганди.
Тўлиқ исми Рикардо Изексон дос Сантос Лейте бўлган Кака 1982 йилнинг 22 апрель санасида дунёга келганди. Унинг отаси инженер, онаси эса ўқитувчи бўлган. Кака 2002 йилдан то 2014 йилга қадар Бразилия терма жамоаси сафида 92 та беллашувда майдонга тушди ва рақиблар дарвозасига 29 та гол уришнинг уддасидан чиқа олди.
Кака оиласи билан Сан-Паулу шаҳрига кўчиб келиб, шу ердаги футбол мактабларидан бирида қўним топди ва ундаги ўйинлари билан Бразилияда машҳур «Сан-Паулу» клуби скаутлари назарига тушди. У 18 ёшида катта футболда дебют қилди.
Биринчи мавсумидаёқ Кака 12 та гол уриб, ўша йили дунёнинг энг яхши 100 футболчиси қаторидан жой олганди, деб ёзди «Championat.asia». Кейинроқ ярим ҳимоячи илк жамоаси учун 131 та ўйинда иштирок этиб, 48 бор муваффақият қозонди.
2003 йил Кака «Милан»га кўчиб ўтди. Янги жамоаси Бразилия клубига 8,5 миллион евро тўлади. Унинг қадами қутлуғ келиб, «Милан» кўп ўтмай УЕФА Суперкубогида ғолиб чиқди.
Миландаги илк мавсум Кака учун омадли кечди. У ўзининг илк голини айнан дербида киритди. Мавсум якунида голлари сони 10 та эди. «Милан» эса А серия чемпионлигига эга чиққанди.
2006—2007 йилги мавсумни миланликлар қайғу билан бошлади. Италия футболидаги келишилган ўйинлар сабаб клуб мавсумни минус очколар билан старт олдирганди. Бироқ якун қувончли бўлди ва «Милан» Чемпионлар Лигасида ғолибликни қўлга киритди. Кака эса мусобақанинг энг яхши футболчиси деб топилди.
2009 йил «Манчестер Сити» Кака учун 100 миллион евро таклиф қилди. Бироқ футболчининг ўзи АПЛ клубига ўтишни истамади ва рекорд бўлиши кутилаётган трансфер амалга ошмай қолди. «Милан» иқтисодий қийинчиликлар билан ўралашиб қолгач эса, жамоа футболчини Мадриднинг «Реал» клубига 68,5 миллионга пуллади. «Таклиф шунчалик яхши эдики, жамоам уни инкор қила олмади», — деб тушунтириш берганди Кака.
6 йиллик шартнома давомида Каканинг фаолияти бир текис кечмади. У жуда кўп марта жароҳатланди, ҳатто илк йилида мавсумнинг ярмини ўтказиб юборишга мажбур бўлди. Шу тариқа у 2013 йил «Милан»га қайтди ва икки йиллик келишувга эришди. Бироқ Миланни ҳам тез орада тарк этди. Шартномасида жамоаси Чемпионлар Лигасига йўлланма ола билмаса, у кетиши борасидаги банд бор эди. Кака шундай қила қолди.
Ўтган вақт давомида Кака миланликлар учун 100-голини уриб, бу жамоа сафида 100 та гол урган тарихдаги ўнинчи футболчига айланиб олганди.
2014 йилнинг 1 июль куни АҚШнинг «Орландо Сити» клуби Кака билан битим имзолади. У фаолиятини ҳам айнан шу клуб сафида якунлади.
Кака Бразилия термаси билан 2002 йил жаҳон чемпионлигини қўлга киритганди. Ўшанда у Коста-Рикага қарши биргина ўйинда майдонга чиқарилган ва 25 дақиқа тўп сурган, холос. 2005 ва 2009 йилги мавсумларда эса пентакампионлар билан Конфедерациялар Кубогида зафар қучган.
Кака Италия ва Испания чемпиони, Чемпионлар Лигаси ғолиби, «Олтин тўп» соҳиби. Клублар ўртасида жаҳон чемпиони бўлишга ҳам улгурган — 2007 йилда. Испания ва Италияда кубоклар, суперкубокларни бегона қилмаган.
2002 йил Бразилияда Какани энг яхши деб топишди. Италияда эса бундай бахт футболчига икки бор насиб қилди. Клублар мундиалида ҳам «Олтин тўп» айнан Какага топширилди.
Изоҳ (0)