Замонавий декоратив косметикалар — сувга чидамли таркиблар ва кучли пигментлардан ташкил топган. Улар юздан тезда ўчиб кетмаслик учун ишлаб чиқарилган. Аммо бундай макияж кийимга тегиб қолса, чинакам муаммога айланади. Ушбу мақолада уй шароитида макияж доғларини кийимдан тозалашнинг самарали усуллари билан танишасиз.
Кийимдаги тонал крем доғини қандай кетказиш мумкин?
Оддий кир ювиш кукунлари тонал кремга қарши кураша олмайди, чунки крем таркибида фақат пигмент эмас, балки матога чуқур сингадиган ёғ ва мум ҳам бор. Бундай ҳолатда оддий идиш ювиш суюқлиги ёрдам бериши мумкин:
1. Доғ тушган жойни совуқ сувда ивитинг.
2. Тўғридан-тўғри доғга бир неча томчи идиш ювиш воситасини томизинг ва бир неча дақиқага қолдиринг.
3. Матони бармоқ ёки юмшоқ тиш чўткаси билан мулойим силанг. Нозик матолар учун қошиқнинг орқа томонидан фойдаланиш тавсия этилади.
4. Доғ устига қоғоз сочиқ қўйинг ва енгил босиб туринг. Ишқалаш мумкин эмас!
5. Доғни кран сувида ювинг ва зарурат бўлса, жараённи такрорланг.
Сув асосидаги тонал кремни ювиш осонроқ — соқол олиш кўпигини синаб кўринг. Доғга суртинг, 3–5 дақиқа кутинг, сўнг юмшоқ мато билан артиб олинг. Натижа етарли бўлмаса, яна такрорланг, бу сафар кўпроқ восита ишлатинг.
Яна бир универсал усул — тиббий спирт. Пахтага шимдириб, доғни артиб чиқинг. Кейин кийимни одатдаги режимда ювинг — натижага ҳайрон қоласиз.
Қандай қилиб туш доғини тозалаш мумкин?
- Киприклар учун туш таркибида ҳам ёғлар бўлади, шунинг учун бу ҳолатда ҳам идиш ювиш воситаси самара беради:
1. Доғга воситадан бир томчи томизинг, бармоқ ёки юмшоқ чўткада мулойим силанг.
2. 10–15 дақиқага қолдиринг.
3. Кейин кийимни иложи борича юқори ҳароратда машинада ювинг.
Натижадан мамнун бўласиз, ҳеч қандай из қолмайди.
Яна бир усул макияжни олиб ташловчи нам салфеткалар. Муҳими, доғни кийимнинг орқа томонидан тозалаш. Салфетка ифлосланмай қолгунча давом этинг, сўнг кийимни ювинг.
Лаб бўёғи доғини қандай ювиш керак?
Помада кийим учун яна бир “айёр” душмандир. Уни йўқотишнинг самарали усуллари:
• Сода + лимон шарбати: Пастасимон ҳолга келтириб, доғга суртинг. Ярим соат кутинг, сувда ювинг ва кир машинасида ювиб ташланг. Лимон оқартиради, сода эса юмшоқ тозалайди — бирга ажойиб натижа беради.
• Соқол олиш кўпиги: Доғга суртинг, бир неча дақиқа кутинг, сўнг ювиб ташланг. Тез, оддий ва самарали.
• Оқ сирка: 1:2 нисбатда дистилланган сув билан аралаштиринг, доғга суртинг, 5 дақиқа кутинг, ювинг, сўнгра кир ювиш машинасида ювинг — ажабланарли натижа беради.
• Қўл антисептиги: Агар таркибида бўёқ бўлмаса, доғга тўғридан-тўғри қуйинг. Спирт ёғни яхши эритади. Бир неча дақиқа кутинг ва сувда ювинг.
Изоҳ (0)