Одатда саратон касаллиги 60 ёшдан ошган одамларда ривожланади, бироқ бугунги кунда 18–45 ёш оралиғидаги шахсларда ҳам онкологик ҳолатлар учраб турибди. Қуйида ёшлар орасида энг кўп аниқланаётган саратон турлари ва уларнинг олдини олиш бўйича тавсиялар берилади.
Бош мия ва марказий асаб тизими саратони
Касалликнинг илк белгиси сабабсиз бош оғриғидир. Агар сизда бош оғриғи тез-тез такрорланса, невропатологга мурожаат қилиш тавсия этилади. Шифокор кўригидан ўтиш хавфли касалликни аввалроқ аниқлашга ёрдам беради. Бундан ташқари, мия саратонида овқат билан боғлиқ бўлмаган қайт қилиш, бош айланиши, мушаклардаги оғриқ, ҳолсизлик ва титроқ каби ҳолатлар ҳам кузатилиши мумкин.
Қалқонсимон без саратони
Одатда 40 ёшдан кейин аниқланади. Аёллар орасида эркакларга қараганда кўпроқ учрайди. Узоқ вақт давомида ҳеч қандай белги бермаслиги мумкин. Қалқонсимон безда тугунлар пайдо бўлиши кўпинча хавфсиз бўлади, бироқ саратон аниқланса, без жарроҳлик йўли билан олиб ташланади.
Қалқонсимон бези саратонини аниқлашнинг энг осон ва информатив усули — бу УТТ (ултратовуш текшируви). Якуний ташхисни қўйиш учун пункция олинади ва цитологик таҳлил ўтказилади.
Меланома
Бу тери саратонининг алоҳида тури бўлиб, ташқи кўринишда холларга ўхшаб кетади. Аммо агар хол кўриниши ва ҳажми ўзгара бошласа, қонаса ёки қичишса, дерматологга мурожаат қилиш керак. Шифокор дерматоскопия таҳлилини бажаради, бу мутлақо оғриқсиз текширувдир.
Бундан ташқари, FotoFinder номли аппарат бутун тана терисини рақамли дерматоскопия орқали текшириб, организмдаги минимал ўзгаришларни аниқлай олади. Бундай текширувлар профилактик мақсадда ҳам ўтказилиши мумкин. Тери саратонига чалиниш хавфи қуёш нурларининг узоқ давом этувчи таъсири ёки куйишлар туфайли ошади.
Кўкрак бези саратони
Бу турдаги саратон ривожланишида ирсият катта рол ўйнайди, шу сабабли хавф даражасини генетик тест орқали аниқланиш мумкин. Махсус тест натижаси саратонга мойилликни кўрсатса, шифокор қандай профилактик чоралар кўриш кераклигини тушунтириб беради.
Бачадон бўйни саратони
Аёллар орасида кенг учрайдиган хавфли касалликлар бўйича 5-ўринда туради. Кўпинча бачадон бўйни эрозияси ёки дисплазия каби хавфсиз ҳолатлар фонида ривожланади. Бу турдаги саратон эрта босқичда яхши даволанади. Шу боис мунтазам равишда гинеколог кўригидан ўтиш, таҳлиллар топшириш ва колпоскопия қилиш жуда муҳимдир.
Ҳар қандай турдаги саратоннинг олдини олиш мумкинми?
Кўпчилик онкологик касалликларнинг олдини олиш учун оддий қоидаларга амал қилиш етарли:
- Фойдали маҳсулотларни истеъмол қилиш ва тўғри овқатланиш, трансёғлар ва оддий углеводлардан воз кечиш;
- Мунтазам жисмонан фаол бўлиш;
- Уйқу ва дам олиш режимига амал қилиш;
- Касалликларни ўз вақтида даволаш.
Изоҳ (0)