Ўзбекистонда 4 ойда зўравонликка учраган қанча хотин-қизга ёрдам кўрсатилди?

Ўзбекистонда 4 ойда зўравонликка учраган 2 317 нафар хотин-қизга ёрдам кўрсатилди. Бу ҳақда Ижтимоий ҳимоя миллий агентлиги хабар берди.

Унга кўра, 2025 йил I-чорак давомида жами 17 878 нафар ижтимоий ҳимояга муҳтож аҳолига юридик ёрдам ва ҳуқуқий маслаҳатлар кўрсатилган. Хусусан, хизмат тури бўйича:

• 1 162 нафар шахснинг манфаатларида фуқаролик ва маъмурий судларга даъво аризаси киритилган ёки ёзиб берилган;
• 470 нафар ижтимоий ҳимояга муҳтож аҳоли манфаатларини кўзлаб давлат органлари ва ташкилотларига талабнома киритилган;
• 16 246 нафар шахсга ижтимоий хизмат ва ёрдамларни кўрсатиш соҳасида ҳуқуқий тушунтириш ва маслаҳат (консултация) бериш хизматлари кўрсатилган.

Аҳоли тоифалари бўйича эса юқори кўрсаткичлар:

• кам таъминланган оилаларнинг аъзолари — 12 662 нафар (70,8 фоиз);
• ногиронлиги бўлган шахслар —  1 758 нафар (9,8 фоиз);
• тазйиқ ва зўравонликка учраган хотин-қизлар — 2 317 нафар (13 фоиз);
• ўзгалар парваришига муҳтож шахслар — 460 нафар (2,6 фоиз);
• етим ва ота-она қарамоғидан маҳрум бўлган болалар — 260 нафар (1,5 фоиз);
• ота-онаси хорижий давлатларга кетган, шу жумладан ташқи меҳнат миграциясига кетган болалар — 122 нафар (0,7 фоиз);
• муайян яшаш жойига эга бўлмаган шахслар — 94 нафар (0,5 фоиз);
• бошқа ижтимоий ҳимояга муҳтож аҳоли тоифалари — 206 нафар (1,1 фоиз) қайд этилди.

“Камбағал оилаларни давлат томонидан ижтимоий қўллаб-қувватлаш тизимини янада такомиллаштириш тўғрисида”ги президент фармони қабул қилинди. 

Мазкур фармонга мувофиқ, 2025 йил 15 майдан бошлаб Камбағал оилалар реестрига киритилган ҳамда ушбу реестрга тушиш хавфи мавжуд бўлган оилалар “қизил”, “сариқ” ва “яшил” тоифаларга ажратилади. Улар учун белгиланган ижтимоий қўллаб-қувватлаш чоралари ушбу тоифаларга мувофиқ тарзда амалга оширилади.

“Қизил” тоифага қуйидаги мезонларга мос келувчи оилалар киритилади:

• оила аъзоларининг ҳар бирига тўғри келадиган ўртача ойлик даромади минимал истеъмол харажатларидан кам бўлиши;
• аъзоларнинг камида бири соғлиғи ҳолатига кўра меҳнатга лаёқатсиз бўлиши;
• парваришга муҳтож аъзоси, жумладан ногиронлиги бўлган фарзанди бўлиши;
• оила таркибида ёлғиз яшовчи, ўзгалар парваришига муҳтож кекса ёки ногиронлиги бўлган шахс бўлиши;
• боқувчисини йўқотган ёки боқувчиси жазони ижро этиш муассасасида бўлган оилалар.

“Сариқ” тоифага қуйидагилар киради:

• оила аъзоларининг ҳар бирига тўғри келадиган ўртача ойлик даромади минимал истеъмол харажатларидан кам бўлиши;
• аъзолари соғлиғи ҳолатига кўра меҳнатга лаёқатли бўлиши.

“Яшил” тоифага қуйидагилар киритилади:

• оила аъзоларининг ҳар бирига тўғри келадиган ўртача ойлик даромади минимал истеъмол харажатларининг 1 бараваридан 1,5 бараваригача бўлиши;
• оила илгари “қизил” ёки “сариқ” тоифага мансуб бўлган бўлса;
• оиланинг камбағал оилалар реестрига киритилиш эҳтимоли юқори бўлса.

Мазкур тоифалаш тизими орқали эҳтиёжманд оилаларни янада аниқроқ аниқлаш ва улар учун мослаштирилган ижтимоий ёрдам чораларини кўриш кўзда тутилган.

Президент маҳаллаларда камбағалликни қисқартириш бўйича қилинган ишлар сарҳисоби ва 2025 йил учун устувор вазифаларга бағишланган видеоселектор йиғилишида 2025 йил бандликни таъминлаш ва камбағалликдан чиқаришда энг муҳим ва ҳал қилувчи йил бўлишини таъкидлаганди. Ҳар бир маҳалла бўйича мақсадли кўрсаткичлар белгиланди. Аҳоли бандлигини таъминлашга қаратилган “маҳалла лойиҳаси” дастури доирасида ажратиладиган 1 миллиард доллар кредит ресурслари банклар ва ҳудудлар кесимида тақсимланди

Камбағалликни қисқартириш ва бандлик вазирлиги берган маълумотга кўра, Ўзбекистонда камбағаллик даражаси 2024 йил якунига кўра 11 фоиздан 8,9 фоизга камайди.