Буюк Британия соғлиқни сақлаш хизмати ортиқча вазнга эга болаларнинг оғирлигини назорат қилиш учун “жосус тарози” беришни режалаштирмоқда. Бироқ беморларнинг ўзи вазни ҳақидаги маълумотни билмайди. Бу ҳақда идора сайтида хабар берилди.
Минглаб оилалар уйда фойдаланиш учун рақамли тарозига эга бўлади. У 15 та ихтисослаштирилган клиникада 350 та оилада синовдан ўтказилган. Ота-оналар ва болалар клиникага ташриф буюриш ўрнига илова орқали масофадан туриб шифокорлар билан алоқада бўлиши мумкин.
Тарози рақамларни кўрсатмайди, лекин боланинг вазнини қайд этади. Ушбу маълумот Миллий соғлиқни сақлаш хизмати қошидаги вазн назорати клиникаларидаги шифокорлар ва ҳамширалар фойдаланиши мумкин бўлган мобил иловага узатилади.
Ушбу инқилобий восита мутахассисларимизга болаларда вазн йўқотишнинг ривожланишини кузатишга, уларга ва ота-оналарига соғлом одатларни ривожлантиришга ёрдам бериш учун мунтазам равишда маслаҳат беришга ёрдам беради, дейди идоранинг клиник директори Саймон Кенни.
The Times маълумотларига кўра, агар болалар вазн йўқоца, Миллий соғлиқни сақлаш хизмати ходимлари уларга мақтов хабарларини юборади. Агар беморларнинг вазни ошса, илова уларга “кўп овқатланишни қандай тўхтатиш” бўйича маслаҳатларни кўрсатади.
Британиянинг Иқтисодий масалалар институти мутахассиси Кристофер Сноудон рақамларсиз “жосуслик тарозиси”ни беришни “бемаънилик” деб атади.
Буларнинг барчаси пулни беҳуда сарфлашдек туюлади — одамларга камроқ овқатланиш ҳақида оддий маслаҳатлар юбориш, худди улар бу нарсани ўзлари билмагандек, дея қўшимча қилди у.
Буюк Британияда икки ёшдан 15 ёшгача бўлган ҳар еттинчи бола ортиқча вазндан азият чекмоқда. 2021 йилдан буён болалар семизлигини даволаш бўйича ихтисослаштирилган клиникаларда 2 ёшдан 18 ёшгача бўлган 4 784 нафар болага ёрдам кўрсатилган.
Изоҳ (0)