Макадамия дунёдаги энг қиммат ёнғоқлардан бири ҳисобланади. У юмшоқ бўлиб, қаймоқ ва ванилга ўхшаш таъмга эга. Таркибида фойдали моддалар жуда кўп. Агар уни тўғри танлаб, қаттиқ пўстлоғини қандай ажратишни билсангиз, макадамия соғлиқ учун жуда фойдали маҳсулот бўла олади. Қуйида бу ёнғоқни нима учун рационга қўшиш кераклиги ва ундан қандай фойдаланиш ҳақида маълумот берилади.
Макадамиянинг фойдали таркиби
• Фойдали ёғлар. Макадамия таркибининг қарийб 75 фоизи тўйинган ёғ кислоталаридан иборат. Бу жиҳатдан у зайтун ёғига ўхшайди. Улар юрак-қон томир саломатлигини қўллаб-қувватлайди ва “ёмон” холестерин даражасини пасайтиради.
• Оқсил ва клетчатка. Бу ёнғоқ узоқ вақт тўқлик ҳиссини беради ва овқат ҳазм қилишни яхшилайди.
• Витамин ва минераллар. Макадамия Э ва B гуруҳи витаминлари, магний, калий, темир ва рухга бой. Улар асаб тизимини тинчлантиради, иммунитетни мустаҳкамлайди ва тери ҳолатини яхшилайди.
• Антиоксидантлар. Ушбу ёнғоқни мунтазам истеъмол қилиш яллиғланишларга қарши курашиш ва қариш жараёнини секинлаштиради.
Эслатма: Макадамия ёнғоғи юқори калорияли маҳсулот ҳисобланади. Унинг 100 граммида тахминан 720 ккал бор. Шунинг учун ёнғоқни меъёрида истеъмол қилиш керак. Кунига 5–7 дона етарли бўлади.
Қандай макадамияни танлаш керак?
Ёнғоқ харид қилаётганда қуйидагиларга эътибор беринг:
• Бутунлиги. Қобиғи билан бўлган бутун ёнғоқлар ўзининг таъми ва фойдали хоссаларини яхши сақлайди. Тозаланган бўлса, силлиқ, доғсиз, ёриқсиз бўлиши керак.
• Ранги. Ёнғоқ ядрочаси оч сарғиш крем рангда, бир хил бўлиши керак. Қорайган, сарғайган ёки ёқимсиз ҳидли ёнғоқлар сифатсиз ҳисобланади.
• Қадоқланиши. Ҳаво ўтказмайдиган ёки вакуумли қадоқдаги ёнғоқларни танланг — улар ҳавода камроқ оксидланади.
• Таркиби. Агар қовурилган макадамия олаётган бўлсангиз, таркибига қаранг: туз, шакар ёки сунъий қўшимчаларсиз вариантни танланг.
Макадамияни қандай чақиш керак?
Макадамиянинг пўстлоғи жуда қаттиқ. Уни чақиш учун махсус мосламалар керак бўлади.
Агар ёнғоқ олдиндан ёрилган бўлса, иш осонлашади. Одатда бундай ёнғоқларга кичик металл калитча қўшиб берилади. Уни ёрилган жойига киргизиб, бурасангиз, пўстлоқ очилади.
Агар ёнғоқда ҳеч қандай ёриқ бўлмаса, кучли ёнғоқ ёрувчи мослама ёки қисқич керак бўлади. Баъзан болға ҳам ишлатилади, лекин эҳтиёт бўлиш зарур — ёнғоқни эзиб юбормаслик керак.
Энг қулайи — олдиндан чақилган ёки тозаланган макадамия сотиб олиш.
Изоҳ (0)