Авиация соҳасида 10 йиллик тажрибага эга борт кузатувчи Але Педроса самолётда саёҳат қилувчи йўловчиларни огоҳликка чақирди. Унинг сўзларига кўра, парвоз пайтида уйқуга кетиш ҳаёт учун хавфли бўлиши мумкин. Бу ҳақда Mirror нашрига таянган ҳолда “Главред” хабар берди.
Педросанинг таъкидлашича, кўпчилик йўловчилар самолёт бортида энг оддий хавфсизлик қоидаларига амал қилмайди, энг кенг тарқалган хатолардан бири бу учиш ёки қўниш вақтидан аввал уйқуга кетишдир.
“Тушунаман, узоқ сафар ва саёҳатлар инсонни чарчатади. Самолётга чиқибоқ ухлаш истаги пайдо бўлиши мумкин. Аммо айнан учиш ва қўниш пайтида ҳушёр бўлиш керак. Бу фавқулодда ҳолат юз берганда тезлик билан ҳаракат қилиш имконини беради”, дейди стюардесса.
Бундан ташқари, учиш йўлагида ҳаракат пайтида эшитиладиган баланд товушлар йўловчини қўрқитиши ёки чалғитиши мумкин. Айнан шу босқичда фавқулодда ҳолатлар юзага келиш эҳтимоли юқори бўлади.
Педроса самолётда спиртли ичимликлар борасида ҳам огоҳлантириш берди. У йўловчиларга ўзлари билан олиб келган спиртли ичимликларни истеъмол қилмасликни тавсия қилди.
“Ўзлари билан олиб келган алкоголни ичиш кўплаб мамлакатларда қонунга зид ҳисобланади. Борт кузатувчилар сифатида биз сизнинг бошқаларга зарар етказмаслигингизга ишонч ҳосил қилишимиз керак”, дейди у.
Стюардессанинг яна бир тавсияси бу шахсий гигиенага эътибор беришдир, хусусан, самолётда ялангоёқ юриш қатъиян тавсия этилмайди.
“Оёқ кийимингизни ўтирган жойингизда ечсангиз бўлади. Аммо йўлак бўйлаб ёки ҳожатхонага ялангоёқ юриб борманг”, дея якунлади Педроса.
Изоҳ (0)