19 июль куни Вьетнамда бортида 53 киши бўлган сайёҳлик кемаси ағдарилиб кетди. Ҳодиса оқибатида камида 34 киши ҳалок бўлган, 8 киши бедарак йўқолган. Бу ҳақда Вьетнамнинг VnExpress интернет портали хабар бермоқда.
Куангнин вилояти маъмуриятининг маълум қилишича, кема маҳаллий вақт билан соат 12:55 атрофида сафарга чиққан. Соат 13:30 да кема тўсатдан бўронга дуч келиб, ағдарилган, 14:05 да эса GPS сигнали йўқолган. Воқеа содир бўлган ҳудудда ўша пайтда кучли шамол, дўл ва чақмоқ билан ёмон об-ҳаво ҳукм сурган.
Ҳодиса жойига қутқарув бўлинмалари — чегара хизмати, ҳарбий-денгиз флоти, полиция ва ўнлаб кемалар етиб келган. Вьетнам ҳарбий-денгиз кучлари учта кема, иккита катер ва 30 нафар ҳарбий хизматчини жўнатган. Ғаввослар қидирув ишларини мураккаб шароитларда олиб борган. Кучли оқим, ёмон кўриниш ва чўккан кеманинг улкан тузилиши операцияларни қийинлаштирган.
Бортда 53 киши бўлган сайёҳ бўлган. Ҳодиса оқибатида камида 34 киши ҳалок бўлган, 8 киши бедарак йўқолган. 11 кишини қутқаришга эришилган.
Қутқарилганлар орасида ҳушида бўлган, бироқ кўплаб жароҳатлар олган 10 ёшли бола ва қисман сув босган каютадан дераза орқали чиқариб олинган 14 ёшли ўсмир ҳам бор.
Кема йўловчиларининг аксарияти Ханой аҳолиси бўлиб, улар орасида 20 дан ортиқ бола бўлган. Энг кичик йўловчи атиги 3 ёшда, энг каттаси эса 53 ёшда эди.
Кечқурун фожиа жойига Вьетнам бош вазири Фам Мин Чин топшириғи билан бош вазир ўринбосари Чан Хонг Ха етиб келган. У ҳалок бўлганларнинг оила аъзоларига ҳамдардлик билдириб, қутқарув операциясини ўтказиш, жабрланганларга ёрдам кўрсатиш ва ҳалокат сабабларини аниқлаш учун барча кучларни сафарбар этишни буюрган.
Дастлабки маълумотларга кўра, кема 2015 йилда қурилган бўлиб, узунлиги 24 метр, юк кўтариш қобилияти 12 тонна ва 48 йўловчига мўлжалланган эди. Кема охирги марта 2023 йил январь ойида техник кўрикдан ўтказилган.
Изоҳ (0)