АҚШ ва Хитой савдо музокаралари 90 кунга кечиктирилиб, 10 ноябрга қолдирилгани маълум қилинди. Бу ҳақда BBC хабар берди.
Тегишли қўшма баёнот икки давлат ўртасида режалаштирилган келишув муддатдан бир неча соат олдин эълон қилинган. Хусусан, АҚШ президенти Дональд Трамп 11 август куни “божхона сулҳини узайтириш тўғрисидаги фармон”ни имзолаган. Бу қарор натижасида Вашингтон Хитой маҳсулотларига 145 фоизлик, Хитой эса Қўшма Штатлардан келаётган товарларга 125 фоизлик тарифларни жорий этишни яна кечиктиради. Амалдаги келишувга кўра, АҚШ хитойлардан келадиган импорт маҳсулотига 30 фоизлик, Пекин эса америка товарларига 10 фоизлик божни сақлаб қолади.
Оқ уй бу кечиктириш “савдо номутаносиблигини бартараф этиш” ва “адолатли савдо амалиётини таъминлаш” борасида музокараларга қўшимча вақт беришини билдирмоқда. Маълумот ўрнида, Қўшма Штатларнинг Хитой билан савдо тақчиллиги 2024 йилда қарийб 300 миллиард долларни ташкил этган, бу эса жуда юқори кўрсаткич экани таъкидланмоқда.
Июль ойида бўлиб ўтган музокаралар “конструктив” деб баҳоланган эди. Ўшанда Хитойнинг бош музокарачиси икки томон ҳам сулҳни сақлаб қолишга интилаётганини айтган. АҚШ расмийлари эса якуний қарорни президент Дональд Трампдан кутаётганини билдирган.
Бу икки гигант давлат ўртасидаги савдо таранглиги 2025 йил апрель ойида кескин кучайганди. Трамп бир қатор давлатларга, жумладан Хитойга ҳам рекорд даражадаги савдо божларини жорий этган. Пекин эса бунга жавобан тарифларни ошириб, ўзаро савдони деярли тўхтатиб қўйган. Май ойида томонлар айрим чораларни бекор қилишга келишган.
Ҳозирги музокараларда томонлар нодир ер металлари, Россия нефтини сотиб олиш ва чиплар савдосини чеклаш каби масалаларни муҳокама қилишда давом этмоқда. Трамп сўнгги кунларда ушбу экспорт чекловларининг бир қисмини юмшатиб, АМD ва Nvidia каби компанияларга айрим чипларни Хитойга сотишга рухсат берди. Бунинг эвазига компаниялар ўз даромадининг 15 фоизини Қўшма Штатлар ҳукуматига ўтказади. Шунингдек, Вашингтон TikTok’ни Хитой компанияси ByteDance’дан ажратиб олишга интилмоқда, Пекин эса бунга қарши чиқмоқда.
Оқ уй маълумотларига кўра, божхона сулҳига қарамай, икки давлат ўртасидаги савдо оқимида 2025 йил камайиш қайд этилган. Жумладан, йилнинг дастлабки 6 ойида АҚШ Хитойдан 165 миллиард долларлик маҳсулот олиб кирган бўлиб, бу 2024 йилга нисбатан 15 фоиз кам дегани. Вашингтоннинг Хитойга экспорти эса 20 фоизга қисқарган.
Изоҳ (0)