Баъзан гўзал кадрлар ортида ҳақиқий азоб-уқубатлар яширинган бўлади. Бу фильмлар жазирама иссиқда, қаттиқ совуқда, жисмоний ва руҳий изтироблар чегарасида суратга олинган.
“Халоскор тонг”
Вернер Херзог кинодаги реализмнинг энг катта мухлиси ҳисобланади. Унинг лойиҳаларида қатнашишга розилик берган актёрлар бу ҳақда билишади. “Халоскор тонг” фильми Таиланд ўрмонларида, жазирама ҳавода суратга олинган, шу сабабли кўпчилик тропик касалликларга чалинган. Суратга олиш бошланишидан олдин Херзог актёрлардан озишни талаб қилган. Кристиан Бэйл 25 кг, Стив Зан 18 кг, Жереми Дэвис 15 кг озган. Режиссёрнинг ўзи ҳам 13 кг вазн ташлаган.
Энг хавфли саҳналардан бири самолётнинг қулаши эди. Пиротехникларнинг хатоси туфайли каскадёр юзидан жиддий куйган. Бэйлнинг қурт-қумурсқаларни ейиши, яланғоч ҳолда ерда ухлаши ва илонлар тўла дарёларда сузиши эса бу ижронинг чўққиси бўлган.
“Рембо IV”
Силвестр Сталлоне Бирма режимига қарши кураш ҳақидаги ҳикояни суратга олишда имкон қадар воқеликка яқинлашишга интилади. “Рембо IV” фильмининг суратга олиниши Таиланд ва Мьянма чегарасида бўлади, ўша пайтда у ерда ҳақиқий жанглар бўлаётган эди. Бир куни суратга олиш гуруҳига дарёнинг нариги қирғоғидан ўқ узишади — омад туфайлигина ҳеч ким жароҳатланмади.
Сталлоне мина ва ўқлардан даҳшатли тан жароҳатлари олган қочқинларни кўрганини айтади ва бу унинг сюжетни тушунишига кучли таъсир кўрсатади. Чангалзордаги суратга олиш жараёнининг ўзи ҳам оғир кечган: намлик, ҳашаротлар ва ҳарбийларнинг доимий таҳдиди ишни ниҳоятда қийинлаштириб юборади. Натижада жангари фильм экранларга чиқади, бироқ Мьянмада тақиқланади.
“Омон қолган”
“Омон қолган” фильмидаги роли туфайли Леонардо Ди Каприо “Оскар”ни қўлга киритади, бироқ бу учун қийинчиликлардан ўтишига тўғри келади. Ди Каприо деярли доим сувдан ниҳоятда оғирлашиб кетган ҳайвон терисини елкасида кўтариб юрарди. Энг муҳими: вегетариан бўлишига қарамай, у ўз қаҳрамонига ўхшаб бизоннинг хом жигарини ейишга мажбур бўлади.
Суратга олиш гуруҳининг бошидан ўтганларини ҳам унутмаслик керак. Режиссёр Алехандро Гонсалес Инярриту сунъий ёруғликдан фойдаланишни тақиқлайди, шу боис фақат муайян вақтлардагина ишлаш мумкин эди. Бундан ташқари, у воқеаларни хронологик тартибда суратга олишни талаб қилади. Буларнинг барчаси жараённинг 10 ойга чўзилишига ва бюджетнинг 135 миллион долларгача ошиб кетишига сабаб бўлади.
Қаҳратон совуқ ва қатъий талабларга бардош беролмаган кўпчилик ишдан кетади. Қолганлардан бири — оператор Эммануэл Любецки эди. Натижада режиссёрлик ва операторлик иши учун ҳам “Оскар”га сазовор бўлишади.
“Бугунги апокалипсис”
“Бугунги апокалипсис” классик фильмини беш ойда суратга олиш режалаштирилган эди. Бироқ иш бир ярим йилга чўзилиб, чинакам “апокалипсис”га айланади. Фильм Америка кун тартибига мос келмагани сабабли суратга олиш жараёни тайфунлари билан машҳур бўлган Филиппинга кўчирилади. Бир неча бор тайфунлар декорацияларни деярли бутунлай вайрон қилади.
Муҳими, ҳукумат Френсис Форд Копполага ўзининг ҳарбий вертолётларидан фойдаланишга рухсат беради. Аммо айни пайтда Филиппин қўзғолончиларга қарши курашаётгани боис техникалар тез-тез ҳақиқий жанговар операцияларга жалб этиларди. Вертолётлар бошқа учувчилар билан қайтгани учун уларга ҳар сафар вазифани қайтадан тушунтиришга тўғри келарди.
Актёрлар ҳам вазиятни мураккаблаштиради. Капитан Уиллард ролини ижро этган Мартин Шин образга шу қадар берилиб кетадики, асабий ҳолсизлик ва ичкиликбозликка дучор бўлади. Сайгон меҳмонхонасидаги руҳий тушкунлик саҳнасида у ҳақиқий юрак хуружига учрайди ва уни шошилинч равишда чангалзор орқали эвакуация қилишга тўғри келади. Марлон Брандо (полковник Курс) эса майдонга мутлақо тайёргарликсиз келади. У сценарийни ўқимаган, озиш ўрнига семирган эди.
Бироқ “Стоп, олинди” дейилганидан кейин ҳам қийинчиликлар тугамайди. Материал шунчалик кўп эдики, монтаж икки йил давом этади. Уч соатга қисқартирилган версияси Каннда намойиш этилганда ҳаммани ҳайратга солади. Фильм бош совринни қўлга киритади ва Коппола шундай деди: “Менинг фильмим Вьетнам ҳақида эмас, у Вьетнамнинг ўзи”.
Изоҳ (0)